ОХУ-ын нэрт гэрэл зурагчин Дмитрий Марков Псков хот дахь гэртээ нас барсан байдалтай олдсоныг түүний найзууд нь телеграм хуудсанд мэдээлжээ. Одоогоор түүний үхлийн шалтгаан тодорхойгүй байна.

Оросын нөлөө бүхий гэрэл зурагчдын нэг Д.Марков 2007 он хүртэл Москвад байрлалтай "Аргументы и Факты" сонинд сэтгүүлч, гэрэл зурагчнаар ажилласан, 2016 онд iphone 7 гар утасны сурталчилгаанд зориулсан гэрэл зургийн уралдаанд Оросоос оролцсон анхны төлөөлөгч.

Сүүлийн жилүүдэд чөлөөт уран бүтээлчээр ажиллаж хар тамхи, архинд донтсон өсвөр насны хүүхдүүдэд туслах ажил хийж байсан Д.Марковын хамгийн алдартай бүтээл нь Алексей Навальныйгийн анхны шүүх хурал дээр авсан дээрх гэрэл зураг юм. В.Путины дэглэмийг гэрэл зургаар харуулсан гэж алдаршсан уг бүтээл дуудлага худалдаагаар хоёр сая рублийн үнэ хүрсэн билээ.

Сөрөг хүчний лидер Алексей Навальныйг дэмждэг гэдгээ нуудаггүй байсан Д.Марковыг нэрт улс төрчийн үхэлтэй зэрэгцэн амь насаа алдсанд эмзэглэж байгаагаа найзууд нь илэрхийлжээ.

Эх сурвалж: Радио Свободо