ОХУ-ын сөрөг хүчний удирдагч Алексей Навальный хоёрдугаар сарын 16-ны баасан гаригт чанга дэглэмтэй Ик-3 шоронд нас барсан. Эрх баригчид түүний цогцсыг нууж байгаа талаар Навальныйн хэвлэлийн төлөөлөгч Кира Ярмыш мэдэгджээ. Тэр үүнийг "Энэ зүгээр нэг үхэл байгаагүй. Энэ бол аллага. Тэд ул мөрөө баллахыг хичээж байна. Гэр бүлийнхэнд нь цогцсыг нь хүлээлгэж өгөхгүй байна. Цогцос хаана байгааг, гэр бүлд нь хэзээ өгөхийг бид мэдэхгүй байна" гэжээ.

Навальныйн гэр бүлийнхэнд өгсөн мэдээллээр Навальный 16-ны баасан гаригт 14:17 цагт нас баржээ. Гэвч нас барсан шалтгааныг хэлээгүй байна. Навальныйн хэвлэлийн төлөөлөгч, хуульч болон ээж нь цогцос хадгалах байранд очсон боловч Навальныйн цогцос тэнд байгаагүй аж. 

Бямба гаригт Оросын хотуудад сөрөг хүчний улстөрчийн дурсгалыг хүндэтгэх арга хэмжээнүүд зохион байгуулах үеэр цагдаа нар 300 гаруй хүнийг баривчилсан тухай хүний эрхийн OVD-Info байгууллага мэдээлжээ. 47 настай улстөрчийн гэнэтийн үхэлд өрнөдийн орнууд Оросын эрх баригчид буруутай гэж үзэж, Их Долоогийн гишүүн орнуудын гадаад хэргийн сайд нар нөхцөл байдлын талаар дэлгэрэнгүй мэдээлэл өгөхийг Москвагаас шаардсан байна.

Кремлийн хэвлэлийн алба Навальныйн үхлийн талаар ерөнхийлөгч Путинд дуулгасан гэх боловч Путин энэ талаар байр сууриа илэрхийлээгүй байна.