Өмнөд Солонгосын Засгийн газар Хөдөө орон нутаг дахь эмч сувилагчийн дутагдалтай байдал, зайлшгүй шаардлагатай эмнэлгийн тасгуудыг байгуулах зорилгоор жилийн элсэлтийн квотыг 2000 орон тоогоор нэмэгдүүлэх шийдвэрийг өнгөрсөн долоо хоногт гаргасан. Гэтэл Өмнөд Солонгосын эмч нар анагаах ухааны их сургуулийн элсэлтийн квотыг нэмэгдүүлэх тухай засгийн газрын төлөвлөгөөг эсэргүүцэн жагсаал хийж, ажлаас халагдах өргөдлөө гаргаж байна. Харин засгийн газар нь анагаахын сургалттай эмнэлгүүдэд зайлшгүй шаардлагатай эмнэлгийн тусламж үйлчилгээг таслахгүй үзүүлэхийг үүрэг болгожээ.
Эмч нар төлөвлөгөөгөө эргэн харахыг Засгийн газраасаа шаардаж, уг шийдвэрийг ирэх дөрөвдүгээр сард болох Парламентын сонгуулийн өмнө популист шийдвэр гэж үзэж байна. Мөн тус улсын эмч, дадлагажигч эмч нар энэ шийдвэрийг өөрсөдтэй нь зөвлөлдөхгүйгээр гаргасан, ингэж элсэлтийн квотыг судалгаагүйгээр нэмэх нь анагаах ухааны боловсрол, үйлчилгээ муудахад хүргэнэ гэсэн үүднээс Засгийн газрынхаа төлөвлөгөөг эрс шүүмжилж байгаа юм байна. Өнөөдөр Эрүүл мэндийн дэд сайд нь мэдээлэл хийхдээ дадлагажигч эмч нар хоёрдугаар сарын 20-нд ажлаасаа гарах шийдвэр гаргасанд Засгийн газрын зүгээс маш их харамсаж байгааг илэрхийлжээ. Өмнөд Солонгосын засгийн газар олон зуун эмч нарын ажлаас халагдах өргөдөл гаргасны хариуд анагаахын сургалттай 221 эмнэлгийг ажилтны ээлжийн амралтыг нэг дор өгөхийг хориглож, зайлшгүй шаардлагатай эмнэлгийн тусламж үйлчилгээг тасалдуулахгүй ажил үүргээ гүйцэтгэхийг үүрэг болгосон байна. Эмч нарын холбоод 2025 оноос эхлэн анагаахын оюутнуудын тоог 2000-аар нэмэгдүүлэх нь хэтэрхий огцом өсөлт гэж үзэж, эмнэлгийн төлбөрийг нэмэгдүүлэхэд байгаа нөөц бололцоог ашиглахыг эрх баригчдаасаа хүсэж байгаа юм байна.
Өмнөд Солонгос улс эмчийн тоог нэмэгдүүлэх шаардлага нийгмийн амьдралаас урган гарч байгаа зайлшгүй эрэлттэй холбоотой юм байна. Хөгжингүй орнуудын дунд хүн амын тоотой харьцуулахад Өмнөд солонгос улс эмчийн тоогоор хамгийн бага үзүүлэлттэй, үүний зэрэгцээ хүн амын насжилт хурдацтай нэмэгдэж байгаагаас эмнэлгийн үйлчилгээний эрэлт хэрэгцээ эрс өссөн байна.
Монголын мэдээ
