Турк улс Израилаас элчин сайдаа зөвлөлдөх нэрийн дор эгүүлэн татжээ. Газын зурваст энгийн хүн амын эсрэг халдлага дайралтууд үйлдэж байгаагаас нь болж хүмүүнлэгийн хямрал газар авч, гал зогсоох болон хүмүүнлэгийн тусламж саадгүй нэвтрүүлэх уриалгуудыг Израил хүлээж авахаас татгалзаж байгаагийн улмаас ийм шийдвэрт хүрлээ гэж Туркийн гадаад хэргийн яамнаас сэтгүүлчдэд өгсөн мэдээлэлд дурдсан байна.

Улмаар Тель-Авивт суугаа Туркийн элчин сайд Озкан Торунларыг Анкарад зөвлөлдөхөөр эгүүлэн дуудсан гэж энэ яамнаас мэдээлсэн байна. Туркийн Ерөнхийлөгч Рэжеп Тайип Эрдоган өмнө нь 10 сарын 27-нд Истанбулд болсон Палестиныг дэмжигчдийн олон мянган хүнтэй жагсаал дээр, Газад хядлага үйлдэж байгаагийнх нь төлөө Израилыг Анкарагийн зүгээс “дайны гэмт хэрэгтэн улс” хэмээн зарлана гэж мэдэгдэн, бас энэ бүхэнд Өрнөд бүрэн хариуцлага хүлээх ёстой гэдгийг цохон хэлж байсан. Мөн Турк улс Израилтай харилцах харилцаагаа эргэн харна гэдгийг мэдээлж байсан юм.

Туркийн Ерөнхийлөгч мөн өчигдөр өөрийн хэвлэлийн албанд мэдээлэл хийж уулзах үедээ, Газын зурвас дахь “цус урсгалтыг зогсоохын тулд” Турк улс Израилын тагнуулын алба, Гадаад хэргийн яамтай хэлэлцээ хүртэл хийж “дипломатын боломжит бүх хүч нөөцийг ашиглаж байна” гэж мэдэгджээ. “Хамас” бүлэг болон Палестины засаг захиргаатай ч мөн холбоо харилцаатай байгаа гэдгээ Эрдоган ярьсан байна. Тэрчлэн “Нетаньяху цаашид бидний хувьд, яриа хэлэлцээ өрнүүлэх хүн биш болсон. Түүний нэрийг бид бүр дарж, хассан” гэж ярьж байсан.

Мөн Эрдоган Израилыг дэмжиж байгаа Өрнөдийн орнуудыг шүүмжилсний зэрэгцээ Анкарагийн Европын Холбоонд итгэх итгэл “ихэд ганхлаа” гэж мэдэгдсэн юм. Үүний өмнө  Туркийн Эрүүл мэндийн яам, бүслэлтэд байгаа Газын зурвасаас хүнд өвчтөнүүдийг Турк рүү эмчлэхээр хүлээж авахад бэлэн байгаагаа дахин илэрхийлсэн байна. Газын зурвас дахь хорт хавдрын цорын ганц эмнэлэг болох Туркийн сангийн дэмжлэгтэй эмнэлэг Израилын цохилтын улмаас их хэмжээгээр сүйдсэн тухай Газын зурвасын ЭМЯ өмнө нь мөн мэдээлсэн юм.

Энэ зуур Газын зурваст амь үрэгдсэн Палестинчуудын тоо 9770 болж, тэдгээрийн 4000 нь хүүхэд, 2500 нь эмэгтэйчүүд байгааг Хамас-ын захиргаан дахь ЭМЯ-ны төлөөлөгч Израилын дайралт эхэлсний 29 дэх өдрийг тохиолдуулсан хэвлэлийн бага хурал дээр мэдээлжээ. Одоогоор Тель-Авиваас элчин сайд, дипломат төлөөлөгчдөө эгүүлэн татаад байгаа орнуудад Болив, Гондурас, Колумб, Чили, Иордан улсууд багтаж байна.

Монголын мэдээ агентлаг