Палестины Исламын Хамас бүлэглэл Йерусалим дахь шашны ариун газруудын нэг Аль Акса сүмийг гутаан доромжилж, Газын Зурвасыг бүсэлсний хариуд “Аль Аксагийн шуурга” цэргийн ажиллагааг эхлүүллээ.  Хамас Еврейчүүдийн Симчат Тора хэмээх үндэсний томоохон баярын үеэр гэндүүлж дайрсан нь Израилын армийн бэлэн байдлыг сориод зогсохгүй Палестины талаас гэндүүлж довтолсон 1973 оны дайныг эргэн санууллаа гэж хэвлэлд онцолжээ. Хамасын дайчид Израилийн өмнөд, хойд хилээр 7 чиглэлээр нэвтэрчээ. Палестины удирдагч Махмуд Аббас террорист үйл ажиллагаа зохион байгуулагч, газар нутаг эзлэн түрэмгийлэгчдийн эсрэг өөрсдийгөө хамгаалах эрхтэй гэж мэдэгджээ.

Нөхцөл байдалтай холбогдуулан Израилын ерөнхий сайд Беньяамин Нетаньяху үндэсний аюулгүй байдлын зөвлөлөө шуурхай хуралдуулж, зэвсэгт Хамас бүлэглэлийн эсрэг “төмөр сэлэм” нэртэй цэрэг дайны ажиллагаа зарлалаа. Израилын арми Газын зурвас руу 2200 гаруй удаа пуужин харваж, агаараас бөмбөгдөж байна. Нетаньяху Израил улс цэргийн ажиллагаа бус дайнд орлоо гэж мэдэгдэж, Хамасын зэвсэгт дайчдаас өмнөд хилээ цэвэрлэхийг армидаа үүрэг болгосон байна.

Яг одоо Израилын өмнөд хилд гол тулаан болж байгаа, Израилын арми Хамасын дайчдаас газар нутгаа эргүүлж аваагүй байгаа юм байна. Израилын өгсөн мэдээллээр тус улсын 20 гаруй энгийн иргэн амь үрэгдэж, 540 гаруй хүн шархадсан байна. Газын зурваст мөн энгийн иргэд амь үрэгдэж, олон тооны хүн шархадсаны зэрэгцээ Газын эмнэлгүүд цус хандивлахыг уриалсан байна. Хамас бүлэглэл 2007 онд Газын Зурваст хяналтаа тогтоосноос хойш Израил улс тус бүсийг хориглолтод оруулсан. Газын Зурваст 15 жил 2,1 сая хүнийг орж гарахыг, бараа бүтэгдэхүүн оруулж гаргахыг хориглосноор тус газар нутгийн нийгэм, эдийн засгийн байдлыг сүйрэлд хүргэжээ. Хориглолтоос хойш Израил Палестин дөрвөн удаа дайн хийж, олон арван удаагийн зэвсэгт тэмцэл хийж ирсэн. Газын Зурвас нь 1967 оны Араб Израилын дайны дараа Йорданы баруун эрэг, Зүүн Йерусалимын хамт Израилын түрэмгийлэлд орсон Палестины өөрөө удирдах эрхтэй 2,1 сая хүн амтай жижиг газар нутаг.

Газын Зурвасын төлөө, газар нутгийн төлөө Израил Палестин олон жил дайн, зэвсэгт тэмцэл хийж ирсэн. Өнөөдрийн энэ нөхцөл байдал тус бүс нутгийн улс төрд тоглоомын дүрмийг өөрчилж магадгүй гэж Катарын их сургуулийн профессор дүгнэсэн байна. Олон улсын зүгээс хоёр талтай байр суурь илэрхийлж байна. Израилын холбоотон АНУ нөхцөл байдлыг ойроос ажиглаж байгаагаа мэдэгдсэн бол Британи, Герман, Итали улсууд Израил руу гэнэтийн цохилт өглөө гэж Хамасыг буруутгасан байна.

Харин Хамас бүлэглэлийг дэмждэг гэгддэг Иран улс, Хезболла бүлэглэл Палестины дайчдыг дэмжиж байгаагаа илэрхийлжээ. Турк, Египэт улсууд хоёр талыг зэвсэгт тэмцлээ зогсоож, энгийн иргэд олноор үрэгдэхээс сэргийлж нөхцөл байдлыг намжаахыг уриалжээ.

Монголын мэдээ агентлаг