Жил бүрийн 10-р сарын эхний 7 хоногт Нобелийн шагналтнуудыг зарладаг уламжлалтай. Энэ дагуу өнөөдөр хамгийн эхэнд Физиологи буюу Анагаах ухааны салбарын 2023 оны Нобелийн шагналтнуудыг зарлалаа. Ковид-19-ийн эсрэг үр дүн өндөртэй, мРНХ вакцин бүтээх үндэс суурийг тавьсан нээлтийнхээ төлөө Унгарын эрдэмтэн Каталин Карико, АНУ-ын биохимич Дрю Вайсман нарт энэ шагналыг олгосноо Нобелийн Хороо зарласан байна.

Дархлаажуулалт болон дархлааны эмчилгээнд рибонуклеиН хүчлийг үр өгөөжтэй ашиглахад хувьсгал гаргасан хувь нэмрийг  Каталин Карико, Дрю Вайсман нарын судалгааны ажил оруулсан. Шинэ конавирусний эсрэг Модерна, Байонтек/Пфайзер вакцинуудыг бүтээхэд голлох үүрэг гүйцэтгэсэн тэдний бүтээл дэлхий нийтийг ковид-19-ийн цар тахал нэрвэж, өөр бусад халдварт тахал дэгдэх аюул өндөр байх үед үнэлж баршгүй үнэ цэнтэй нь нотлогдсон юм гэж Нобелийн хороо шийдвэрээ танилцуулахдаа онцолсон байна. Маргааш Физикийн, лхагва гаригт химийн, пүрэв гаригт Утга зохиолын салбарын Нобелийн шагналтнуудыг нэрлэнэ. Харин баасан гаригт энэ оны Нобелийн Энх тайвны шагналтны нэрийг зарлана. Харин Альфред Нобелийн нэрэмжит Эдийн засгийн салбарын шагналтныг 10-р сарын 10-нд зарлах юм.

Нобелийн хороо жил бүрийн шагналд нэр дэвшигчид болоод тэднийг нэр дэвшүүлсэн хүмүүс, байгууллагуудын талаар сүүлийн мөч хүртэл нууцалдаг. Гагцхүү салбарын мэргэжилтнүүд нэр дэвшигчид хэн байж болох талаар таамаг дэвшүүлж ярилцдаг. Шведийн шинжээчдийн үзэж байгаагаар, энэ жилийн физиологи, анагаах ухааны салбарын Нобелийн шагналтнаар, төрөхийн өмнөх инвазив бус шинжилгээ боловсруулалтад чухал хувь нэмэр оруулсан Хонгконгийн молекул биологич Деннис Ло тодорч магадгүй байна. Хөхний өмөн үү өвчний BRCA1 удамшлын генийг нээсэн америкийн эрдэмтэн Мэри-Клэр Кинг мөн өндөр магадлалтай эрдэмтний нэгд тооцогдож байсан юм.

Динамитыг нээсэн Шведийн эрдэмтэн Альфред Нобелийн гэрээслэлийн дагуу 1901 оноос жил тутам олгох болсон олон улсын хамгийн нэр хүндтэй энэ шагналыг анагаах ухааны салбарт 112 удаа олгоод байгаа юм байна. Нийтдээ 224 эрдэмтэн, түүний дотор 12 эмэгтэй энэ шагналыг гардан авч байжээ. Мөн энэ салбарт Нобелийн шагнал хүртсэн хамгийн залуу эрдэмтэн нь инсулинийг нээсэн Фредерик Бантинг 32 настайдаа болж байсан бол, хорт хавдрын удамшлын генийг нээсэн 87 настай Пейтен Раус хамгийн өндөр настай нь болж байсан байдаг юм байна.