Украин дахь сөргөлдөөний талаарх Германы засгийн газрын бодлогыг шүүмжилж, Оросын эсрэг хоригт сөргөөр ханддагаараа нэртэй болсон бундестагийн депутат Сара Вагенкнехт өөрийн улс төрийн нам байгуулахаар  шийдэж байгаа тухай түүний хүрээнийхний эх сурвалжид үндэслэн Bild хэвлэл мэдээлжээ.

Шинэ нам ирэх арванхоёрдугаар сар гэхэд байгуулагдсан байх аж.

Вагенкнехт албан ёсоор энэ тухай мэдэгдээгүй байгаа ч Bild уг намд хамгийн чухал болох дөрвөн заалтыг нэрлэжээ.

Тодруулбал, бодлого чиглэгдэх энх тайвны эрмэлзэл, дипломат арга баримжаа, соёлыг солихтой тэмцэх, ухаалаг эдийн засгийн бодлого байх ёстой гэжээ. Мөн тэрээр цэргийн зардлыг цаашид нэмэхийн эсрэг, Оростой энхийн харилцаа тогтоох шаардлагын төлөө тэмцэх юм байна.

Вагенкнехт Германы улстөрчдийн чансаанд Батлан хамгаалахын сайд Борис Писториус, Баварийн Ерөнхий сайд бөгөөд Христийн нийгмийн холбоо намын тэргүүн Маркус Зёдер нарын дараа гуравт бичигджээ.

М.ЦОГТ