Twitter сүлжээний шинэ ерөнхий захирлаар америкийн NBC Universal  масс медиа компанийн реклам хариуцсан хэсгийн тэргүүн асан Линда Яккарино томилогдлоо. Зургаан долоо хоногийн дараа шинэ ажилдаа орох эмэгтэйн томилгоог тавдугаар сарын 12-нд Илон Маск батлан мэдээлсэн юм.

Линда Яккарино гэж хэн бэ? Тэр тэрбумтантай ямар холбоотой вэ? Линдаг яагаад "хилэн алх" гэж нэрлэдэг вэ?

Маск яагаад Twitter-ийн захиралаас татгалзав?

Хэдхэн сарын өмнө, Twitter-ийн захирал Маск мэдэгдэхдээ хэсэг бүлэг хүмүүс сурталчилгаа олгогчдод дарамт үзүүлж байгаагийн улмаас Twitter ашгийнхаа тал хувийг алдаж байна гэсэн байв. Тэрбумтан 44 тэрбум доллараар сүлжээг худалдан авсны дараа сурталчилгаа байрлуулагчид нь гэрээгээ цуцлах болжээ.

Шинэ эзэн тэднийг тайвшуулан "Америкийн үг хэлэх эрх чөлөөг устгахгүй" гэж амласан юм. Түүгээр ч барахгүй, Маск энэ цагаар "Үгийн эрх чөлөөний үнэмлэхүй хүн" гэдгээ харуулан сүлжээний контентын модерац буюу хяналтыг сулруулав.

Мөн тэрээр царцаагдаад байсан аккаунтуудыг сэргээж эхлэхийн зэрэгцээ топ менежерүүдийнхээ 80%-ийг халсан юм. Дөрөвдүгээр сард тэр ВВС-д ярихдаа реклам байрлуулачдийн ихэнхи нь эргэн ирсэн компани бараг алдагдалгүй болсон гэж байв. Гол нь тэр хэлсэндээ хүрдэг гэдгийг үзүүлжээ.

Шүүмжлэгдсэнийхээ эцэст тэр Twitter дэх өөрийн хуудаснаа олны дунд санал асуулга явуулсан ба түүгээр асуугдагчдийн 57,5 хувь нь түүнийг ерөнхий захирлаас татгалзах хэрэгтэй гэжээ. "Энэ ажлыг авах хангалттай тэнэгийг олонгуутаа тушаалаа өгнө" гэж Маск шоглоом болгон хэлж байснаа хэрэгжүүлж буй нь энэ бололтой.

"Линда бизнес-бизнес ажиллагаанд анхаарч, би бүтээгдэхүүний дизайн ба шинэ технологийг хариуцана" гэж Маск бичжээ.

Twitter сүлжээний шинэ захирал Линда Яккарино гэж ямар түүхтэй хүн бэ?

Линда Яккарино сүлжээний удирдлагад ирснээр, Twitter олон нийтийн сүлжээний шинэ үеийг нээнэ гэж барууны хэвлэлээр бичиж байна. Британийн The Sun сонин түүнийг "Дэлхийн рекламын ертөнцийн гайхамшигтай алдартан" гэж нэрлэсэн байна. Пенсильванийн их сургуулийн 60 настай төгсөгч NBC Universal-д арав гаруй жил ажиллажээ. Компанийн сайтад бичснээр тэр 2000 хүнийг удирдаж, чиглэл нь рекламаас жилдээ $13 тэрбумын ашиг авчирдаг гэнэ.

Яккарино хэлэлцээр явуулдаг хатуу арга барилаараа "хилэн алх" нэр авчээ.

"Яккарино NBC Universal-д ирснээс хойш түүний багийнхан рекламынхаа худалдаагаар $100 тэрбум гаруй доллар олж, дэлхий даяар Apple News, Buzzfeed, YouTube, Snapchat, Twitter компаниудтай арилжааны хамтын ажиллагааг өргөтгөжээ" гэж The Sun сонин магтжээ. Энэ жилийн хоёрдугаар сард Яккарино авъаясыг тодруулах далайг дамнасан YMU компанийн захиргааны удирдагчаар томилогджээ. Энэ эмэгтэй олон зүйлийг бусдаас өөрөөр хардаг хэмээн америкийн хөрөнгө оруулалтын Mediavest Spark компанийн захирал Жон Мушински хэлсэн байна. Гэхдээ заримдаа өөрийн ажилд хэтэрхий их шан хөлс авдаг гэж бас хэлжээ.

Turner рекламын компанийн Дэвид Леви энэ эмэгтэйг удирдаж байсны хувьд компаниа рекламын дэлхийн лидер болгосон хүн гэсэн байна.

Яккарино Маск хоёрыг юу холбодог вэ?

Энэ хоёр хүн нягт холбоотой учир сүлжээний удирдлагын өөрчлөлт хурдтай байна гэж Bloomberg мэдээлэв. Сүүлийн хэдэн сард Яккарино бүхий л аргаар реклам олгогчдын дунд сүлжээний нэр төрийг сэргээхэд нь тусалжээ.

Майамид өнгөрсөн сар болсон рекламын бага хурал дээр тэр Маскийг найз, танил гэж нэрлэн түүнээс том ярилцлага авчээ. Тэр ярилцаж байхдаа реклам өгөгчид Twitter-ээс өөрсдийн сонирхолын хамгаалалтыг хүлээж байна гэв.

Сонирхолтой нь, саяхан Twitter, NBC Universal хоёр Лос-Анжелесийн 2028 оны зуны Олимпыг сурталчлах талаар хамтын ажиллагааг өргөжүүлэхээр тохиролцсон байна. Яккарино тэр арга хэмжээг сурталчлах эрхтэй болохыг хүссэн гэдэг.

Яккарино ирснээр Twitter хэрхэн өөрчлөгдөх бол

Forbes тэмдэглэснээр, Яккариногийн шинэ тушаал нь реклам олгогчдыг тайвшруулах ба харин Маскийн зарим бишрэгчдыг түлхэж магадгүй гэнэ.

Одоо шинэ тушаалд таарч тохирох эсэхийг хэлэхэд бэрх. Тэр нь түүний бизнес явуулах чадвараас хамаарна. Гол алхамууд хийгдлээ. Хэрэглэгч нарт ямагт сонирхолтой том улстөрчид санаа бодлоо илэрхийлэгчдийн лидерүүдийг тэр татаж чадах уу гэдгээс сүлжээний ажил цаашид хамаарна гэдгийг шинжээчид хэлж байна. Компани нь эхлээд Маскийн хувьд хобби байсан бол одоо байдлыг тогтворжуулж, компанийн тодорхой чиг хандлагатай болоод одоо тэр чадвартай хүмүүст удирдлагаа шилжүүлж байна. Маскт өөрт нь олон тооны төслүүд бий.

Энэ хоёр хүн үзэл бодлоо чөлөөтэй илэрхийлэх талаар санал нийлдэг. Өөрийн томилгооны хариуд Яккарино "Баярлалаа, Илон Маск! Гэгээн ирээдүйг бүтээх таны эрмэлзлэл намайг эртнээс татаж ирлээ. Таны санаа бодлыг Twitter-т хүргэхэд би баяртайгаар туслана. Мөн бид хамтдаа энэ бизнесийг өөрчилнө" гэж сэтгэгдлээ бичсэн байна.

М.ЦОГТ