26 жилийн хугацаанд завсарлаад байсан "Айзам 2" хамтлаг ирэх баасан гаригт тоглолтоо хийнэ. Хамтлагийн “Зүрх сэтгэлийн минь дуунууд” нэртэй тоглолт ганцхан удаа буюу дөрөвдүгээр сарын 7-нд UB palace-н концертын их танхимд болох юм.
Айзам хамтлагийн дэргэдээс үүссэн "Айзам 2" хамтлаг нь анх 1990 онд байгуулагдаж 1997 он хүртэл идэвхтэй уран бүтээлээ хийж байгаад завсарлажээ. Одоо зохиох гэж буй тоглолтоороо шинэ уран бүтээлээс гадна тэр үед дуулж байсан дуунуудаа сэргээж дуулна гэдгийг хамтлагийн ахлагч С.Гантөр хэллээ. Энэ удаагийн тоглолт нь "Айзам 2" хамтлаг хамгийн сүүлд 1997 онд тоглолтоо хийснээс хойш 26 жилийн дараа хийж байгаа анхны тоглолт болж байна.
Тоглолтод зочноор дуучин Б.Сарантуяа, Ж.Алтанцэцэг, Э.Минжинсор, Л.Энхмандах, С.Сэрчмаа болон Титэм, Салхи, Лумино зэрэг хамтлагууд оролцоно. "Айзам 2" хамтлаг 1990-1997 оны үеийн залуучуудын дунд хит болж байсан "Мөрөөдөл", "Чиний харцанд", "Хос Алтанзул", "Бороо", "Дурсамж" зэрэг дуунуудаа дуулна. Тоглолтын найруулагчаар найруулагч, продюсер Р.Мөнхсайхан ажиллаж байгаа юм байна.
Тоглолтын тасалбар ticket.mn дээр зарагдаж байна.
