Орос Хар тэнгист унасан MQ-9 Reaper гэх америкийн нисгэгчгүй онгоцыг олж авахаар ажиллаж эхэлсэн гэдгийг ОХУ-ын Аюулгүйн зөвлөлийн нарийн бичгийн дарга Николай Патрушев гуравдугаар сарын 15-нд ярьжээ.
Тэрээр "Бид түүнийг олж чадах уу гэдгийг би мэдэхгүй. Гэхдээ үүнийг хийх хэрэгтэй. Заавал ч үгүй оролдоод үзэх хэрэгтэй. Амжилт олно гэж найдаж байна" хэмээжээ.
Оросын гадаад тагнуулын албаны дарга Сергей Нарышкин мөн, америкийн нисгэгчгүй онгоцыг олж гарган авч үзэж судлах шаардлагатай. Манайд техникийн боломж бий гэж хэлжээ.
Хар тэнгист унасан MQ-9 нисгэгчгүй онгоц нь АНУ Украин дахь байлдааны ажиллагаанд шууд оролцож байгааг гэрчилж байна гэдгийг ч Патрушев онцолсон байна.
Гуравдугаар сарын 14-нд нисгэгчгүй аппарат огцом хөдөлгөөн хийн Хар тэнгист унан, живжээ. Энэ тухай АНУ-ын Зэвсэгт хүчний Европ дахь командлал (USEUCOM) батлан мэдээлсэн юм. Тэдний мэдээгээр дроныг угтан барьсан оросын сөнөөгч Су-27 онгоц далавчаараа дроны сэнсийг мөргөн гэмтээснээс сүйрэлд хүргэжээ.
Одоо дроныг Севастополь хотоос 60 км-ын зайтай 850-900 метрийн гүнээс илрүүлсэн ба тэнд Оросын хөлөг онгоц хамгаалалт хийж байна. Оросуудад тэр дроны хөдөлгүүр ба доторх цахим төхөөрөмж нь сонирхолтой байгаа юм.
М.ЦОГТ
