Өчигдөр өглөө үүрээр Турк болон Сирийн зарим нутагт эхэлсэн газар хөдлөлтийн улмаас амиа алдсан хүмүүсийн тоо өнөөдөр өглөө 07:00 цагийн байдлаар 3830 хүрснийг CNN мэдээлжээ.

Хоёрдугаар сарын 06-ны өглөө үүрээр, орон нутгийн цагаар 04:17 цагт Туркийн Газиантеп хотын ойролцоо болсон газар хөдлөлтийн дараа гамшгийн бүсэд 13:30 цагийн орчимд дахин 7,5 магнитудын хүчтэй хоёр дахь газар хөдлөлт болсон байна. Газар хөдлөлтөд Туркийн өмнөд бүс нутгийн 10 гаруй хот болон Сирийн зарим хотууд өртөөд байна.

Ойр ойрхон хүчтэй газар хөдлөлт болж байгаагаас иргэд гэртээ болон хоргодох байгууламжуудад орохоос айж гудамжинд байрлацгааж байна. Өчигдөр оройны байдлаар газар хөдлөлтийн улмаас 2000 гаруй барилга байшин сүйдсэн байна.

Энэ удаагийн газар хөдлөлт нь 1999 оны хүчтэй газар хөдлөлтөөс хойш тохиож байгаа хамгийн өндөр хүчтэй газар хөдлөлт бөгөөд ерөнхийлөгч Эрдагон энэ тухай "1930-аад оноос хойш тохиогоогүй том гамшиг учирлаа. Гамшгийн хохирлыг бууруулахын тулд бүх хүчээ дайчлах болно" гэжээ. 

Газар хөдлөлтөд нэрвэгдсэн иргэдийг эрэн хайх, аврах ажиллагаанд тус улсын Онцгой байдлын 10 мянга гаруй аврагч, албан хаагчид ажиллаж байна.  

Турк улсын ихэнх хотуудаар сүүлийн өдрүүдэд хүчтэй цас бороон шуургатай, цаг агаар хүнд байгаа цаг мөчид газар хөдлөлт тохиолдсоноос олон мянган хүн орон гэргүй болж, нөхцөл байдал гамшгийн хэмжээнд хүрчээ.

Иймээс дэлхийн хамтын нийгэмлэгүүд, Еюропын хөрш зэргэлдээ улсууд Турк улсад хүмүүнлэгийн тусламж үзүүлэхэд бэлэн гэдгээ хэлсэн байна.