Шинэ оны эхний өдөр БНАСАУ-ын төрийн хэвлэл мэдээллийн хэрэгслээр удирдагч Ким Чен Ун охиныхоо хамтаар цөмийн пуужингийн байгууламжид зочилж буй "огноогүй" гэрэл зургуудыг нийтэлжээ.
Охины нэр, насыг мэдээллээгүй бөгөөд түүнийг зүгээр л Кимийн "хамгийн хайртай охин" гэж нэрлэсэн байв. Энэ нь удирдагч Ким Чен Уны дэглэм болон түүний хурдацтай хөгжүүлж буй цөмийн зэвсгийг охиндоо өвлүүлэх эцсийн залгамжлагчаар бэлтгэж байж магадгүй гэсэн санааг илэрхийлэхэд хангалттай байв.
Удирдагч Ким Чен Ун мөн өнгөрсөн арваннэгдүгээр сард Өмнөд Солонгосын тагнуулынхан Ким Жу-Ае гэж тодорхойлсон охиноо авчирч, томоохон зэвсгийн туршилт хийсэн байна.
Ким Жу Ае охиныг 9 эсвэл 10 настай гэж үздэг байна.
Ким Чен Ун ирэх даваа гаригт 39 нас хүрнэ. Түүний охиноо олон нийтэд аажмаар танилцуулж байгаа нь Кимийн эцгийнхээ алдаанаас зайлсхийх гэсэн оролдлого байж магадгүй гэжээ.
Удирдагч Ким бол аавынхаа удирдагчаар сонгосон бага хүү нь юм. Гэвч 2010 онд, эцгийг нь нас барахаас нэг жилийн өмнө төрийн хэвлэлд гарах хүртэл жирийн хүмүүс түүнийг хэзээ ч харж байгаагүй. Тэрээр цуст цэвэрлэгээгээр маргаангүй эрх мэдлээ тогтоох хүртэл олон жил зарцуулсан юм.
Ким Чен Ун хүүхдээ өөрийн зэвсэгтэй холбоотой үйл явдалд аваачсан нь Хойд Солонгосын ард түмэн, ялангуяа залуучуудад гэр бүлийнх нь хаант засаглал, цөмийн зэвсгийн хөгжил хойч үедээ ч үргэлжлэх болно гэдгийг сануулж байна гэдэгтэй ихэнх шинжээчид санал нэгджээ.
Өмнөд Солонгосын тагнуулын ажилтнууд Ким Чен Уныг гурван хүүхэдтэй бөгөөд хамгийн том нь хүү байх магадлалтай гэж мэдэгджээ. Жу-а бол түүний хоёр дахь хүүхэд гэж мэдээлжээ.
Б.Бүжлхамаа
