Францын Ерөнхийлөгч Эммануэль Макрон энэ долоо хоногт Вашингтонд өндөр түвшний дипломат айлчлал хийж байгаа ба Байдены үед Францаас хийж буй анхны төрийн айлчлал болж байна. Хоёр удирдагчид Украин дахь Оросын дайны үед харилцаагаа бэхжүүлэхийг эрмэлзэж байгаа.
Өнгөрсөн жил АНУ, Их Британи, Австралийн нууц AUKUS түншлэл АНУ-Францын харилцаанд сөргөөр нөлөөлсөн бөгөөд тэр цагаас хойш энэ хоёр улсын харилцаа өмнө байсан түвшнээсээ улам холдсон. Учир нь AUKUS-тай Австрали 66 тэрбум ам.долларын өртөг бүхий Францын шумбагч онгоцны гэрээгээ цуцалсан нь Францыг уурлуулж, 2021 оны есдүгээр сард Вашингтон, Канберра дахь Элчин сайдуудаа эргүүлэн татахад хүргэсэн юм.
Үүнээс хойш Орос Украинд түрэмгийлснээс үүдэлтэй хамтын ашиг сонирхол, хамтын хүчин чармайлт нь хоёр удирдагчид одоо нийтлэг хэлцлийг олоход тусалсан юм. АНУ-н Үндэсний аюулгүй байдлын зөвлөлийн хэвлэлийн төлөөлөгч Жон Кирби даваа гаригт хийсэн хэвлэлийн бага хурал дээр хоёр улсын урт удаан хамтын түүхтэй холбоотон байхын ач холбогдлыг онцлон тэмдэглэсэн. Мөн тэрээр хэлсэн үгэндээ, "Хэрэв та Украинд болж буй үйл явдлыг харвал, эсвэл Энэтхэг-Номхон далайн бүс нутагт болж буй үйл явдал болон Хятадтай үүссэн хурцадмал байдлыг харвал Франц үнэхээр энэ бүх зүйлийн төвд байгаа. Ерөнхийлөгч Макрон Их Долоод, ялангуяа Европт идэвхтэй удирдагч" гэсэн юм.
АНУ-ын Ерөнхийлөгч Жо Байден, энэхүү улс төрийн айлчлалыг яг зөв бөгөөд хамгийн тохиромжтой үе гэж үзсэн гэж тэр онцолсон байна.
Тэдний уулзалтын хөтөлбөрт Украины дайн, Энэтхэг-Номхон далайн бүс нутагт Бээжингийн нөлөө нэмэгдэж байгаа болон бусад хамгаалалтын асуудлууд давамгайлахаар төлөвлөж байна. Макрон мөн ОХУ-ын Украин руу түрэмгийлснээр Европын эдийн засаг, ялангуяа эрчим хүчний асуудалд хэрхэн нөлөөлсөн талаар ярилцах төлөвтэй байна гэж Financial Times мэдээлэв.
Макроны айлчлал дэд ерөнхийлөгч Камала Харристай НАСА-гийн төв байранд хийсэн айлчлалаар эхлэсэн бол Макроны айлчлалыг тохиолдуулан Цагаан ордон ирэх пүрэв гаригхүртэл арга хэмжээ товложээ.
Эхний өдрийн орой Макрон, Байден нар хоёр талын хэлэлцээ хийхээр уулзаж, эцэст нь төрийн оройн зоогт оролцоно.
Баасан гаригт Макрон Луизиана муж улсын Нью Орлеанс хотод айлчилж, Франц хэлний сургалтын шинэ санг нээж, амбан захирагч Жон Бел Эдвардстай уулзсанаар айлчлалаа дуусгах юм.
Б.Бүжлхамаа
