Индонезийн Жамби мужид нэгэн эмэгтэй аварга могойн дайралтанд өртжээ. Тухайн эмэгтэй ням гарагийн өглөө каучук тариалдаг талбайд ажиллахаар явсан ч сураггүй алга болсон байна. Маргааш нь эмэгтэйг эрэн хайх явцад нутгийн иргэд 5 метр урт, маш том гэдэстэй аварга могой олжээ.
Нутгийн иргэд могойг устгаад дотроос нь эмэгтэйг цогцсыг бүтнээр нь олсон байна.
"Хохирогч могойн гэдсэнд бүрэн бүтэн" гэж цагдаагийн дарга орон нутгийн хэвлэлд ярьжээ.
Түүний хэлснээр хохирогчийн нөхөр ням гаригийн орой каучук тариалангаас талийгаач эмэгтэйн хэрэглэж байсан хувцас, багаж хэрэгслийг нь олсон нь эрэн хайх ажиллагааг явуулахад хүргэсэн байна.
Хэдийгээр ийм тохиолдол ховор ч Индонезид аварга могойн дайралтад амь насаа алдсан анхны тохиолдол биш аж. Тус улсад 2017-2018 оны хооронд ижил төстэй хоёр тохиолдол бүртгэгдсэн байна.
Питонууд хоол хүнсээ бүхэлд нь залгидаг. Тэдний эрүү нь маш уян хатан шөрмөсөөр холбогддог тул олз хэт том байсан ч түүнд тааруулан сунадаг ажээ.
Ердийн үед жижиг мэрэгчдийг хүнсэндээ хэрэглэдэг питон аварга могой биеийн хэмжээ нь томрох тусам илүү том амьтныг ангийн олзоо болгодог байна.Энэ үедээ зэрлэг гахай, буга гөрөөс зэрэг том биетэй амьтдыг бүхлээр нь залгиж чаддаг аж.
Дашрамд, Питон гэж нэрлэгддэг Pythonidae аймгийн могой нь Африк, Ази, Австралид байдаг хоргүй могойн төрөлд багтдаг. Энэ аймгийн могойн дунд дэлхийн хамгийн том могойнууд байдаг бөгөөд одоогийн байдлаар 10 төрөл, 42 зүйлийг бүртгэжээ.
Б.Бүжламаа
