Ерөнхийлөгч Владимир Путины удирдлаган дор ОХУ дайн эхэлснээс хойш анх удаа буюу дайсны цөмийн цохилтод хариу өгөх цөмийн зэвсгийн сургуулилалт хийлээ. Тус сургуулилтад хуурай газрын, тэнгисийн, агаарын хүчнийхэн оролцжээ.

Мөн сургуулилалт амжилттай болж бүх пуужин онилсон байндаа хүрсэн гэдгийг Кремлээс албан ёсоор мэдээлжээ.

Тодруулбал, өчигдрийн сургуулилтын үеэр “Ярс” тив алгасах баллистик пуужинг Плесецкаас Камчаткийн хойгийн Кура полигон руу хөөргөсөн байна. Мөн “Синева” баллистик пуужинг Баренцын тэнгисээс шумбагч онгоцноос харважээ. Мөн агаарын сургуулилалтад алсын тусгалт Ту-95МС хоёр онгоцыг ашигласан байна.

Харин Ерөнхийлөгч Путин "Бохир бөмбөг гэгддэг зэвсгийг өдөөн хатгалгын зорилгоор хэрэглэх төлөвлөгөөтэй байгааг бид мэдэж байна" хэмээн ярьжээ. 

Жил бүр зохион байгуулдаг энэ сургуулилтыг явуулна гэдгээ ОХУ-аас АНУ-ын батлан хамгаалахын яаманд урьдчилан мэдэгдсэн байсан байна.

Дашрамд, энэ удаагийн цөмийн бэлтгэл сургуулилт нь Украины дайн эхэлснээс хойш анхных нь болж байгаа бөгөөд энэ төрлийн өмнөх сургуулилтыг Украин руу халдахаас тав хоногийн өмнө буюу хоёрдугаар сарын 19-ний өдөр хийж байжээ.