Хижабын хууль зөрчсөн хэргээр баривчлагдсан эмэгтэй нас барсны дараа эмэгтэй жагсагчид Иранд болж буй эсэргүүцлийн жагсаалд улам идэвхитэй оролцож, толгойн алчуураа шатааж байна.
Жагсаал таван шөнө дараалан үргэлжилж, хэд хэдэн хот, суурин газруудад хүрчээ.
Цагдаагийн газраас эмнэлэгт хүргэгдсэн хохирогч Махса Амини гурав хоног комд байсан бөгөөд баасан гаригт нас баржээ.
Тегеран хотын хойд хэсэгт орших Сари хотод эмэгтэйчүүд хижабаа /толгойн алчуур/ шатааж, эсэргүүцлийн жагсаал хийж байгаа бөгөөд олон хүн уухайлан дэмжиж байна.
Талийгаач Махса Амини өнгөрсөн долоо хоногт Ираны ёс суртахууны цагдаад эмэгтэйчүүдийг үсээ хижаб буюу толгойн алчуураар боож, гар, хөлөө задгай хувцас өмсөхийг шаарддаг хуулийг зөрчсөн гэж буруутгагдан нийслэлд баривчилагдсан юм.
Тэрээр цагдан хорих төвд унасны дараа удалгүй комд оржээ.
НҮБ-ын Хүний эрхийн дээд комиссарын үүрэг гүйцэтгэгч Нада аль-Нашиф, "Цагдаа нар хатагтай Аминигийн толгойг бороохойгоор цохиж, толгойгоор нь машин мөргүүлсэн гэх мэдээлэл байна" гэж мэдээлжээ.
22 настай тэрээр Ираны баруун хэсэгт орших Курдистан мужаас ирсэн байна.
Цагдаа нар түүнийг зүй бусаар харьцсан гэдгийг үгүйсгэж, "гэнэтийн зүрхний дутагдал" авсан гэж мэдэгдсэн бол талийгаачийн гэр бүлийнхэн түүнийг эрүүл чийрэг байсан гэж мэдэгдээд байна.
Мөн даваа гаригт хамгаалалтын албаныхан жагсагчид руу гал нээсний улмаас гурван хүн амиа алджээ.
Ираны дээд удирдагч Аятолла Али Хаменеигийн туслах даваа гаригт хатагтай Аминигийн гэр бүлд бараалхаж, "Бүх байгууллага зөрчигдсөн эрхийг хамгаалахын тулд арга хэмжээ авна" гэж хэлжээ.
Ахлах парламентын гишүүн Жалал Рашиди Коочи Ёс суртахууны цагдааг олон нийтэд шүүмжилж, энэ хүч нь зөвхөн Иранд "алдагдал, хохирол" учруулсан тул "алдаа" гэж мэдэгдэв.
Б.Бүжлхамаа
