2015 онд баталсан Сонгуулийн тухай хуулийг гурав задалсан сонгуулийн шинэ хуулийг Сонгуулийн ерөнхий хорооноос боловсруулжээ. Хуулийг боловсруулах ажлын хэсгийг УИХ-ын даргын 2017 оны 195 дугаар захирамжаар томилсон юм байна. Ерөнхийлөгчийн сонгуулийн тухай, УИХ-ын сонгуулийн тухай, Аймаг, нийслэл, сум дүүргийн ИТХ-ын сонгуулийн тухай  хуулийн төслүүдэд албан ёсоор санал авч эхэлсэн байна. Эдгээр хуулийн төслүүд 2018 оны намрын чуулганаар хэлэлцэх асуудлын дараалалд багтсан байна.

УИХ-ын сонгуулийн тухай хуулийн төслийн 85.3-т “Орон гарсан Улсын Их Хурлын гишүүний бүрэн эрхийн хугацаа дуусахад нэг жил хүрэхгүй хугацаа үлдсэн бол орон гарсан суудлыг нөхөхгүй” гэсэн заалт шинээр оруулжээ.

Хэнтий аймгийн гурван сум буюу УИХ-ын 42 дугаар тойргоос нэр дэвшиж сонгогдсон Д.Гантулга огцорсон тул парламентын гишүүний орон гарсан. УИХ-ын тогтоолоор 42 дугаар тойрогт 2018 оны аравдугаар сарын 7-нд нөхөн сонгууль явуулах байсан боловч иргэд Үндсэн хуулийн Цэцэд гомдол гаргаж, улмаар Цэц УИХ-ын тогтоолыг Үндсэн хуульд нийцээгүй хэмээн дүгнэсэн. Ингэхдээ төрийн албанд ажиллаж байгаа иргэдийн сонгогдох эрхийг хязгаарласан хэмээх үндэслэл гаргасан тул 42 дугаар тойргийн нөхөн сонгуулийг 2019 оны зургадугаар сарын 1-нээс наана явуулах боломжгүй болоод байна.

Тэгэхээр УИХ-ын намрын чуулганаар Хэнтийн нөхөн сонгуулийг товлосон УИХ-ын 62 дугаар тогтоолыг өөрчилж, сонгуулийн шинэ товыг тогтооно. Хэрвээ УИХ нөхөн сонгуулийг 2019 оны долдугаар сард товлоод, дараа нь УИХ-ын сонгуулийн тухай хуулийг баталбал, төслийн 85.3-т заасанчлан Хэнтий аймагт нөхөн сонгууль болохгүй байх магадлалтай.