Өмнөд Солонгост ачааны машины жолооч нарын ажил хаялт долоо дахь өдрөө үргэлжилж, тус улсын үйлдвэрлэгчид үйлдвэрлэлээ багасгахад хүрч, боомтуудын хөдөлгөөн удаашралд оржээ.

Ачаа тээвэрчдийг төлөөлж буй үйлдвэрчний эвлэлийнхэн жолоочийн аюулгүй байдал, цалин нэмэхийг хангахыг удаа дараа хүссэн гэж мэдэгдэв. Ачааны машины жолоочид шатахууны үнийн өсөлтийг эсэргүүцэж, цалингийн доод хэмжээг баталгаажуулахыг шаардаж байна гэж Ройтерс агентлаг мэдээллээ. 

Нэг ачааны машин сард 2300 орчим ам.долларын (зургаан сая таван зуун мянга орчим төгрөг) шатахуун хэрэглэдэг бөгөөд дөрөвдүгээр сараас хойш ачааны машины сарын шатахууны төлбөр 1000 орчим ам.доллараар нэмэгдсэн гэж Ройтерс агентлагт ярьжээ.

Энэ ажил хаялт нь Өмнөд Солонгосын эдийн засагт өндөр өртөгтэй болж, дотоодод томоохон саатал үүсгэж байна. Эхний зургаан өдрийн дотор 1.6 их наяд вон (1.25 тэрбум ам.доллар) үнэ бүхий автомашин, ган, нефть химийн бүтээгдэхүүний үйлдвэрлэл, тээвэрлэлт тасалдсан гэж засгийн газар мэдэгдэв.

Цаашид энэхүү ажил хаялт нь дэлхийн нийлүүлэлтийн сүлжээг тасалдуулж болзошгүй юм. Гэвч одоогоор тус улсын гол экспортод айхтар том тасалдал гараагүй байна гэж Associated Press мэдээлэв.

Жолооч нар ойрын хугацаанд шаардлагуудыг биелүүлэхгүй бол цахилгаан станц руу хүрэх нүүрс тээвэрлэлтийг зогсооно гэж мэдэгджээ.

Б.Бүжлхамаа

www.nytimes.com