Гудамж талбай, олон нийтийн газарт явахдаа нохойд уруулах, хазуулах болон бусад эрсдэл үүсвэл зөрчлийг хэрхэн шийдвэрлэдэг талаар Цагдаагийн Ерөнхий Газрын (ЦЕГ) Хэвлэл, мэдээллийн төвийн ахлах мэргэжилтэн, цагдаагийн хошууч Б.Дэлгэрхангайгаас тодрууллаа.

-Өнгөрсөн долоо хоногт бага насны хүүхэд нохойд уруулсан хэрэг гарчээ. Энэ талаарх мэдээлэл олон нийтийн сүлжээнд иргэдийн шүүмжлэлийг дагуулаад байгаа. Хүний эрүүл мэндэд хохирол учруулсан ийм нөхцөлд ямар арга хэмжээ авдаг юм бол?  

-Гэмтлийн зэргийг шүүх эмнэлгийн шинжээчийн дүгнэлтээр тогтоодог. Улмаар хөнгөн эсвэл гэмтлийн зэрэгт хамаарахгүй байвал Зөрчлийн хуулиар шийтгэл оногдуулахаар хуульд тусгасан. Харин хүндэвтэр, хүнд хохирол учруулбал Эрүүгийн хуульд заасан гэмт хэргийн шинжтэй үйлдэлд хүрнэ.

Зөрчлийн тухай хуулийн 5.19 дүгээр зүйлд, Орчиндоо аюул учруулж болох амьтныг зохих хамгаалалтгүй байлгасны улмаас хүний эрүүл мэндэд хөнгөн хохирол учруулсан бол учруулсан хохирол, нөхөн төлбөрийг гаргуулж, хүнийг 100 нэгжтэй тэнцэх хэмжээний төгрөгөөр торгоно хэмээн заасан байдаг.

Өөрөөр хэлбэл, тухайн амьтныг тэжээж байгаа эзнээс эмчилгээний зардал болон бусад хохирлын төлбөрийг гаргуулна. Хөнгөн хохирол учруулсан үед дээрх хариуцлагыг тооцдог. 

-Хүнд хохирол учруулбал Эрүүгийн хуулийн дагуу шийдвэрлэнэ гэсэн үү?

-Эрүүгийн хуулийн 20.15 дугаар зүйлд Орчиндоо аюул учруулж болох амьтныг зохих хамгаалалтгүй байлгах тухай заалт бий.

Орчиндоо аюул учруулж болох амьтныг зохих хамгаалалтгүй байлгасны улмаас хүний эрүүл мэндэд хүндэвтэр хохирол учруулсан бол 450 нэгжээс 5,400 нэгжтэй тэнцэх хэмжээний төгрөгөөр торгох, эсхүл 240 цагаас 720 цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл зорчих эрхийг хязгаарлах ял шийтгэнэ.

Хоёрдугаарт, энэ гэмт хэргийн улмаас хүний эрүүл мэндэд хүнд хохирол учирсан, хохирогч нас барсан бол 5,400 нэгжээс 27,000 нэгжтэй тэнцэх хэмжээний төгрөгөөр торгох эсхүл 1-5 жил хүртэлх хугацаагаар хорих ял шийтгэхээр тусгасан байдаг.

Харин Нохой, муур зэрэг гэрийн тэжээвэр амьтныг салхилуулахдаа анхаарах зүйлсийн талаар Жонон мал эмнэлгийн газрын захирал Б.Алтансүх зөвлөж байна. 

Тэрээр "Зарим хүн нохойгоо байнга уяж, гэртээ байлгадаг. Ингэснээр амьтан ч стресст орж бухимддаг. Улмаар хүн, амьтан руу дайрах эрсдэл учирч мэднэ. 

Нохойгоо хошуувчгүй агаар салхинд гаргахдаа хүний хөдөлгөөн ихтэй газраас зайлсхий.

Хэрэв олон хүн цугласан газар явахаар төлөвлөж байвал заавал хошуувч зүүлгэж, хөтөлгөө сунадаг уяатай байх хэрэгтэй. 

Нохойд хүрэхдээ эзнээс нь зөвшөөрөл авч, асуух нь зүйтэй. Иргэд амьтантай харилцахдаа ч соёлтой байх нь чухал" гэлээ.