Оросын тэрбумтнуудын нэг Олег Тиньков дайныг эсэргүүцсэн хурц мэдэгдлийг өөрийн Инстаграм хуудсанд өчигдөр бичжээ. Одоо 54 настай Тиньков 2006 онд “Тинькофф Банк” нэртэй хувийн банкийг байгуулж, 2014 онд $8.2 тэрбумын хөрөнгөөр Оросын 15 дахь баян болж байсан юм. Тэрээр мөн сүүлийн жилүүдэд тэр тогтмол гадаадад амьдарч байгаа аж.

Олег Тиньков “Нэг өглөө шартаж сэрсэн генералууд ямар новшийн армитайгаа ухаарч байна. Улс орон нь бүхэлдээ новш болж, хамаатан садан, худал хуурмаг, боолчлолд автсан байхад арми нь яаж сайн байх юм бэ? Би энэ солиотой дайнаас ганц ч ашигтай зүйл олж харахгүй байна. Гэмгүй хүмүүс, цэргүүдийн амь нас үрэгдсээр” гэсэн байна.

Дараа нь тэр өрнөдийнхөнд хандаж бичихдээ “Эрхэм өрнөдийн хамтрагчид минь! Ноён Путинд нэр нүүрээ аварч, энэхүү аллагыг зогсоох гарцыг гаргаж өгөөч. Илүү ухаалаг, хүмүүнлэг байцгаая. Оросуудын 90 хувь нь энэ дайны эсрэг байна! Мэдээж Z үсэг зурах тэнэгүүд байгаа, гэхдээ ямар ч улс үндэстний 10 хувь тэнэгүүд байдаг шүү дээ” гэж Тиньков мэдэгдэлдээ бичсэн байна.

Тиньков 2020 онд өөрийн байгуулсан “Тинькофф Банк”-ны төлөөлөн удирдах зөвлөлийн даргын албан тушаалаа бусдад шилжүүлсэн юм.

“Тинькофф Банк”-наас гаргасан мэдэгдэлд ноён Тиньковын хувийн үзэл бодолд тайлбар хийхгүй гээд түүнийг одоо үйл ажиллагаанд нь ямар ч хамааралгүй гаднын хүн болсныг баталсан байна.

Эх сурвалж: iKon.mn