Компьютерт ашигладаг хамгийн өргөн хэрэглэгддэг үсгийн фонтуудыг эзэмшдэг АНУ-ын Monotype IMAGING компани Украиныг эзлэн түрэмгийлсэнтэй холбогдуулан Москвагийн эсрэг тавьсан олон улсын хориг арга хэмжээ үргэлжилж байгаа энэ үед Орос дахь хэрэглэгчдийг каталогид нэвтрэх эрхийг хаасан гэж мэдэгдлээ.
Монотипийн хэвлэлийн төлөөлөгч Дөрөвдүгээр сарын 14-нд Оросын төрийн мэдээллийн ТАСС агентлагт гарсан мэдээллийг баталжээ.
"Оростой тогтоосон хориг арга хэмжээ болон олон улсын харилцааны өнөөгийн нөхцөл байдлыг харгалзан бид Оросын компаниуд болон тэдний охин компаниудтай бизнесийн харилцаа тогтоох боломжгүй байгааг хэлэхэд харамсаж байна. Бид нөхцөл байдлыг үргэлжлүүлэн ажиглаж, бодлогоо шинэчилж байх болно" гэжээ.
ОХУ-ын "Ведомости" сонин мэдээллийн технологийн эх сурвалжаас иш татан Оросын хэрэглэгчид Монотипийн фонтуудын каталогид нэвтэрч чадахгүй, өөрөөр хэлбэл Times New Roman, Arial, Verdana, Tahoma, Helvetica зэрэг алдартай фонтуудыг ашиглах боломжгүй гэж мэдэгдсний дараа ийн баталжээ.
Орос дахь компьютер хэрэглэгчид фонт руу нэвтрэхийг оролдоход "Таныг сайт руу нэвтрэхэд саад учруулсан хязгаарлалт тавьсан байж магадгүй" гэсэн мессеж гарч ирж байгаа аж.
Хуульч, шинжээчид "Ведомости" сонинд мэдээлснээр, ОХУ-ын энгийн интернет хэрэглэгчдэд нэвтрэх эрхийг хориглох нь ямар ч нөлөө үзүүлэхгүй ч компьютерийн программ хангамж үйлдвэрлэдэг хэвлэлийн газар, компаниуд ойрын ирээдүйд фонтыг ашиглах боломжгүй болж магадгүй юм. Одоогоор VPN ашиглан түгжрэлээс зайлсхийх боломжтой байна.
ОХУ-ын хууль тогтоомж нь "төр, нийгмийн ашиг сонирхлыг хамгаалах зайлшгүй шаардлагаас шалтгаалан" эзэмшигчид нь тус улсад лиценз олгохоос татгалзсан ч гэсэн албадан тусгай зөвшөөрөл гэж нэрлэгддэг бүтээгдэхүүнийг тус улсад ашиглахыг зөвшөөрчээ.
2014 онд Орос улс Украины Крым бүсийг хууль бусаар өөртөө нэгтгэж, Украины зүүн хэсэг дэх салан тусгаарлагчдын ард дэмжлэг үзүүлсний дараа Монотип Оросын зарим байгууллагууд, тэр дундаа Оросын Батлан хамгаалах яаманд программ хангамж боловсруулдаг мэдээллийн технологийн компаниудад фонт ашиглах зөвшөөрлөө цуцалж байсан юм.
Times New Roman бол Оросын албан ёсны баримт бичгийн стандарт фонт юм. 2016 оны Тавдугаар сард ОХУ-ын Харилцаа холбооны сайд Николай Никифоров албан ёсны байгууллагуудын бичиг баримтыг гадаадын фонтоос "ангижрах" ажлыг хийхийг уриалж байв.
Б.Бүжлхамаа
www.rferl.org
