Оросын тэрбумтан Роман Абрамович дайны галыг зогсоох асуудлаар Украины парламентын гишүүдтэй Гуравдугаар сарын 3-ны өдөр Киев хотод уулзсан байна.

Уулзалтын дараа Роман Абрамовичоос болон Украины парламентын хоёр гишүүнээс химийн бодисын хордлогын шинж тэмдэг илэрчээ. Тэдэнд нүд улайх, нулимс гоожих, нүүр, гарын арьс загатнах зэрэг хордлогын шинж тэмдгүүд илэрсэн тухай эх сурвалж мэдээлсэн байна. 

Одоо Роман Абрамович болон бусад хүмүүсийн биеийн байдал сайжирч байгааг мөн мэдээллээ.

Тэрбумтан Роман Абрамович Киев-Москвагийн хооронд дайны галыг зогсооход зуучлахаар ажиллаж байгаа багийн гишүүн юм.

Оросын талын хатуу чиг шугам баримтлагчид энхийн хэлэлцээг бүтэлгүйдүүлэхийн тулд тэднийг химийн бодисоор хордуулсан байх магадлалтай гэж үзэж байгаагаа эх сурвалж хэлсэн байна. Мөн Bellingcat эрэн сурвалжлах сэтгүүлчдийн бүлгийн гишүүн Кристо Грозев "Энэ халдлага алах бус анхааруулах зорилготой байсан" гэв.

Дашрамд, Украины ерөнхийлөгч Володимир Зеленский өнгөрсөн ням гаригт хийсэн мэдэгдэлдээ Роман Абрамович түүний засгийн газарт Москватай энхийн гэрээ байгуулахад зуучлах санал тавьж байсныг баталсан юм. Гэвч түүнийг хордсон тухай дурсаагүй. 

Барууны орнууд дайнаас үүдэн ОХУ-ын тэрбумтангуудад эдийн засгийн хориг авч байгаа бөгөөд Роман Абрамович үүнд багтаж өөрийн хөлбөмбөгийн "Челси" клубээ зарахаар болсон юм. 

Энэ тухайгаа Роман Абрамович "Өнөөгийн нөхцөлд клубыг худалдах нь хамгийн зөв шийдвэр бөгөөд энэ нь хөгжөөн дэмжигчид, ажилтнууд, клубын ивээн тэтгэгчдэд хэрэгтэй. "Челси"-тэй ингэж хагацах нь надад их хүнд шийдвэр байлаа. Миний хувьд "Челси" клубын нэг хэсэг байсан нь нэр хүндийн хэрэг байлаа” гэж байсан билээ.