БНСУ-ын нэгэн эмч тохиолдлоор уу, тоцооллоор уу мэдэхгүй ямартай ч одоог хүртэл ковидын халдвараар өвчлөөгүй, тусаагүй хүмүүсийн ихэнх нь найз нөхөдгүй байна гэж хэлээд нийтээс нийлээдгүй жавтий хүртжээ.
Гуравдугаар сарын 16-нд Өмнөд Солонгосын Вакцины Нийгэмлэгийн дэд ерөнхийлөгч Ма Санг Хюк өөрийн фэйсбүүк хуудаснаа "Ковид-19-ийн халдвар хараахан аваагүй байгаа насанд хүрэгчид бол хүмүүс хоорондын асуудалтай хүмүүс" гэх утгатай нийтлэл байршуулжээ. Тэрээр энэ постоо маш богино хугацааны дараа устгасан боловч цахим орчинд маш хурдтай тархаж, маргааны гол сэдэв болоод байгаа аж.
Утгачилбал, хэрвээ та COVID-19-ийн халдвар одоо хүртэл аваагүй байгаа бол магадгүй шалтгаан нь найз нөхөдгүй болохоор тэр байх гэсэн байна.
Вирусийн бусад мэргэжилтнүүдээс ялгаатай нь Ма Санг Хюк омикрон хувилбарын тархалт улс орон даяар эрчимтэй явагдаж байгаа тул засгийн газар нийгмээс тусгаарлах арга хэмжээг бэхжүүлэхийн оронд эмчилгээнд анхаарлаа хандуулах ёстой гэж үзэж байгаа нэгэн юм.
Өмнөд Солонгост өдөр тутмын ковидын тохиолдлын тоо 400 мянгыг давж, хүнд өвчтнүүд болон нас баралт дээд амжилт тогтоож байх үед тэрээр ийм бичлэг нийтэлсэн байна.
Мягмар гаригийн өглөөний байдлаар Өмнөд Солонгост батлагдсан тохиолдлын нийт тоо 9.93 саяд хүрсэн нь тус улсын таван хүн тутмын нэг нь халдвар авсан гэсэн үг юм.
"Ковидтой амьдрах" дэглэмийг дэмжигч Ма Санг Хюк эмч орон нутгийн мэдээллийн хэрэгсэлд өгсөн ярилцлагадаа "хүмүүс хоорондын асуудал" гэсэн үг нь вирусын халдвар авах нь гарцаагүй гэдгийг онцолсон зүйрлэл хэмээн тайлбарлажээ.
Тэрээр тус улсын эрүүл мэндийн тогтолцоог өөрчлөн зохион байгуулах хэрэгтэй бөгөөд ингэснээр эерэг шинжилгээ авсан хүмүүс цаг алдалгүй эмчилгээ хийлгэх боломжтой болно гэж үзэж байгаагаа хэлсэн байна. Мөн тэрээр "Ковидын улмаас нас барж байгаа хүмүүсийн хувьд харамсалтай байна, гэхдээ бид өвчтэй байсан ч эмнэлгээр явж чадахгүй, гэртээ айдас, өвдөлтөөс болж зовж шаналж буй хүмүүсийн талаар бодох хэрэгтэй. Тэд эмчилгээ хийлгэх эрхтэй байх ёстой" гэсэн юм.
Өнгөрсөн сарын 6-нд нийтлэгдсэн "Дэлхий 100 жилийн өмнөхөөсөө илүү өвдөж магадгүй" гэсэн гарчигтай мэдээнд Мексикийн халдварт өвчний мэргэжилтэн Бренда Крабтригийн үүнтэй төстэй утгатай жиргээнээс иш татжээ.
Тэрээр "Хэрэв чамд одоо халдвар авсан найз байхгүй бол чамд найз байхгүй" гэжээ.
Үүний зэрэгцээ, сүүлийн үеийн мэдээллээс харахад тус улсын хүмүүс тахлын үеэр урьд урьдынхаас илүү нийгмээс тусгаарлагдмал болсон. Өмнөд Солонгосын Статистикийн газраас Гуравдугаар сарын 15-нд нийтэлсэн "2021 оны үндэсний амьдралын чанарын тайлан"-д дурдсанаар, өнгөрсөн онд нийгмээс тусгаарлах түвшин 34.1 хувь байгаа нь ковид тархахаас өмнөх 2019 онтой харьцуулахад (27.7 хувиар) 6.4 пунктээр өссөн байна. Энэ нь 2009 онд статистик мэдээ гаргаж эхэлснээс хойших хамгийн өндөр үзүүлэлт гэжээ.
Нийгмийн тусгаарлалтын түвшин гэдэг нь хямрал тохиолдоход туслах хүн байхгүй гэж хариулдаг 19-өөс дээш насны насанд хүрэгчдийн эзлэх хувийг илэрхийлдэг индекс юм.
Б.Бүжлхамаа
www.koreaherald.com
