Өчигдөр болж өнгөрсөн Өмнөд Солонгосын ерөнхийлөгчийн сонгуульд сөрөг хүчний консерватив намаас нэр дэвшигч Юн Сүк Ёл ялалт байгууллаа.

БНСУ-ын Үндсэн хуулиар Ерөнхийлөгч 5 жилийн хугацаатай нэг удаа сонгогддог. Цар тахлын халдвар өндөр байгаа ч сонгогчдын ирц 77 хувьд хүрч байгаа нь дэлхий бусад улсуудынхтай харьцуулахад ирц хамгийн өндөр байгаа тохиолдол болжээ.

Сонгуулийн өмнөх санал асуулгын дүнгээс харахад эрх баригч Ардчилсан намын нэр дэвшигч И Жэ Мён болон Ардын хүч намын нэр дэвшигч Юн Сук Ёол нарын аль нэг нь Ерөнхийлөгчийн сонгуульд ялалт байгуулахаар байсан юм.

Ерөнхийлөгчийн сунгаанд ялалт байгуулсан Консерватив үзэл баримтлалтай Ардын хүч намаас нэр дэвшигч Юн Сук Ёолыг аз од нь гийсэн прокурор гэж БНСУ-ын хэвлэлүүд нэрлэдэг байна. Тэрээр тус улсын хоёр экс ерөнхийлөгч, Самсунг компанийн тэргүүн, тус улсын Дээд шүүхийн ерөнхий шүүгч нарын өндөр түвшний авлигын гэмт хэргийг илрүүлэхэд голлох үүрэг гүйцэтгэсэнээрээ ард түмний дунд нэр хүнд олж авсан нэгэн юм.

Юн Сук Ёол өнөөгийн Ерөнхийлөгч Мүн Жэ Иний Засгийн газар болон эрх баригч Ардчилсан намыг орон сууцны үнэ тэнгэрт тулж, орлогын тэгш бус байдал нэмэгдсэнд буруутгаж сонгуулийн сурталчилгаа хийсэн. Мөн "Саяхныг хүртэл би улс төрд орно гэж төсөөлж байгаагүй. Гэхдээ ард түмэн намайг одоо байгаа байр сууринд тавьж, чадамжгүй, авлигад идэгдсэн Ардчилсан намыг төрөөс зайлуулах даалгавар өгсөн" хэмээн сонгуулийн уулзалтын үеэр ярьж байсан юм.

Ерөнхийлөгчийн сонгуульд ялалт байгуулсан Юн нь 1960 оны 12-р сарын 18-нд Сөүл хотод төрсөн. Түүний аав коллежийн профессор, ээж нь багш мэргэжилтэй аж. Тэрээр Сөүлийн их сургуулийг 1994 онд төгсөж 9 дэх удаагийнхаа хуульчийн шалгалтад тэнцэж, прокурор болж байжээ. Мөн Солонгосын хамгийн баян, хамгийн хүчирхэг хүмүүсийн авлигын хэргийн араас хөөцөлдөхдөө улс төрийн дарамт шахалтад автаагүй цэгц шударга мөрдөн байцаагч гэдгээрээ иргэдийн дунд нэрд гарсан юм.

Тэрээр өнгөрсөн жил ерөнхий прокурорын суудлаасаа бууж, консерватив Ардын хүчний намаас ерөнхийлөгчийн сонгуульд нэр дэвшсэн ба Өмнөд Солонгосын ерөнхийлөгч болсон анхны прокурор болж байна.