Оросын агаарын цэргийн хүчнийхэн Украины Мариуполь хотын төрөх эмнэлэг рүү халджээ. Цохилтын үеэр төрөх болон хүүхдийн тасаг сүйдсэн гэж тус улсын албаныхан мэдэгдэв. Энэхүү дайралтын үеэр эх, хүүхэд амиа алдсан гэх мэдээлэл хараахан гараагүй байгаа ч Украины албаныхан энэхүү халдлагыг Оросын армитай тохиролцсон гал зогсоох хэлэлцээрийн үеэр болсон гэж мэдэгджээ. 

Ерөнхийлөгч Владимир Зеленский байгууламжийн дор хүмүүс дарагдсан гэж мэдэгдээд Барууны удирдагчдыг нисэхийг хориглох бүс тогтоохыг уриалав.

Хотын зөвлөл "Сүйрэл асар их байна" гэж мэдэгдээд байна. Мариуполь хотын орлогч дарга Сергей Орлов ВВС-д өгсөн ярилцлагадаа "Хүүхдийн эмнэлгийг бөмбөгддөгийг бид ойлгохгүй байна. Хүмүүс үүнийг үнэн гэдэгт итгэж чадахгүй байна" гэлээ.

НҮБ энэ халдлагыг "санаанд багтамгүй" гэж нэрлэсэн бол Их Британи "жигшүүртэй" гэв.

Украины Ерөнхий сайдын орлогч Ирина Верещук хэлэхдээ, Орос өмнө нь Украины гамшигт хамгийн их нэрвэгдсэн зургаан бүс нутгаас энгийн иргэдийг дүрвэх боломжийг олгохын тулд 12 цагийн турш шинэ гал нээхгүй байх тохиролцоонд хүрсэн байсан гэсэн юм.

Энгийн иргэд зүүн хойд Суми болон Энерходар хотыг орхин явж байна гэж хотын дарга нар мэдэгдэж байна. Гэвч Украины тал Оросуудын халдлага үргэлжилсээр байгаа учраас оршин суугчид бүслэлтэд байгаа Мариуполь хот болон Харьковын ойролцоох Изюм хотыг орхин гарахыг дахин зогсоолоо гэж мэдэгдэв.

Орос улс Украин руу довтлохдоо хугацаат цэргийн алба хаагчдыг ашиглаж байгаагаа анх удаа хүлээн зөвшөөрчээ.

Мөн Украины тал Оросын цэргүүд Чернобылийн цөмийн станцыг булаан авсны дараа хуучин атомын станц цахилгаангүй болсон гэж мэдэгдээд байна.

Б.Бүжлхамаа

www.bbc.com