Исламын бүлэглэл болох ISIS-K Пакистаны баруун хойд хэсэгт орших Пешавар дахь шийтүүдийн сүмийг бөмбөгдсөнөө хүлээн зөвшөөрчээ. Халдлагын улмаас 63 хүн амиа алдаж, 200 орчим хүн шархадсан байна.
Пакистаны цагдаа нар өнгөрсөн бямба гаригт амиа золиослогч этгээд болон халдлагын цаад сүлжээг олж тогтоосон гэж мэдэгдсэн юм. ISIS-K болон Пакистаны аюулгүй байдлын албаныхан бөмбөг дэлбэлсэн амиа золиослогчийг Афганистаны иргэн гэж мэдэгджээ.
Исламын улс буюу лалын шашинт суннит шашинтнуудын алан хядах бүлэглэл нь шийтүүдийг тэрс үзэлтнүүд гэж үздэг бөгөөд Пакистанд өмнө нь хэд хэдэн халдлага үйлдсэн гэдгээ хүлээсэн байдаг. Энэ бол Пакистанд гарсан хамгийн том бөгөөд хамгийн их үхэлд хүргэсэн террорист халдлагын нэг болоод байна.
ISIS-K нь 2015 онд Афганистанд байгуулагдаж, 2019 онд Пакистан дахь бүлгээ нээжээ. Аюулгүй байдлын албаныхан тус бүлэглэлийг Афганистанаас үйл ажиллагаагаа явуулдаг гэж үзэж байгаа ч Афганистаны Талибанчууд нүүлгэн шилжүүлсэн гэж мэдэгдээд байгаа юм. Өнгөрсөн найм дугаар сард Талибанчууд Кабулын ойролцоох шоронг эзлэх үед тэдний 1600 орчим дайчин оргосон гэж албаныхан үзэж байна.
Өнгөрсөн намар тус бүлэглэл Афганистан дахь шийтүүдийн сүмд дэлбэрэлт үйлдэж, олон арван хүний амь үрэгдсэн билээ.
Б.Бүжлхамаа
www.nytimes.com
