Орос Украин руу довтолж, дэлхийг цочроогоод буй. Улмаар дэлхий дахинд өргөн цар хүрээтэй дайралт хийх вий гэсэн болгоомжлолоос үүдэлтэй зах зээлийн үймээн самуун дэгдэв. Газрын тосны үнэ нэг баррель нь 105 ам.долларт хүрч, Европын байгалийн хийн  үнэ 50 хувиар өсч, дэлхийн хөрөнгийн биржийн индексүүд унасан байна.

Чикагогийн худалдааны зөвлөл дэх улаан буудайн фьючерс пүрэв гаригийн үдээс хойш 5 гаруй хувиар өслөө. Украин, Орос хоёр дэлхийн улаан буудайн нийлүүлэлтийн бараг дөрөвний нэгийг бүрдүүлдэг.

Ерөнхийлөгч Байден "АНУ болон холбоотнууд түрэмгий хариу өгөх шаардлагатай гэдэгт эргэлзэх зүйл байхгүй. Америк дарангуйлагчдыг эсэргүүцдэг. Бид ийм л хүн" гэсэн юм. 

Хонг Конг дахь Хан Сенг 3.2 хувиар буурсан Азиас эхлээд санхүүгийн болон түүхий эдийн зах зээлд шууд бөгөөд өргөн хүрээтэй нөлөө үзүүлсэн. Германд DAX индекс 4 гаруй хувиар буурч, Stoxx Europe 600 3.5 орчим хувиар буурсан байна.

Wall street дээр S&P 500 арилжаа эхлэхэд 2.5 хувиар унасан бөгөөд анхны үймээн самуун бага зэрэг тайвширсан бололтой байна. Харин Оросын хөрөнгийн бирж өнөөдөр өглөөнөөс арилжаагаа түр зогсоожээ.

Түүхий эдийн үнийн өсөлт нь Европ болон АНУ-ын инфляцийг ойрын хэдэн сард 1.5 пунктээр өсгөж болзошгүй гэж Capital Economics судалгааны компани мэдэгдэв. Мөн Ойрхи Дорнод, Африкийн зарим хэсэг улаан буудайнхаа ихэнх хэсгийг Орос, Украинаас авдаг бөгөөд энэхүү хязгаарлалт нь нийгмийн эмх замбараагүй байдалд үүсгэж вий гэж санаа зовж байна.

Б.Бүжлхамаа

www.nytimes.com