Коронавирусийн “Омикрон” шинэ хувилбар халдвар авсан залуу хүмүүст харьцангуй хөнгөн ч урьд өмнө байгаагүй шинж тэмдэг илэрч байна гэж ӨАБНУ-ын Анагаах ухааны ассоциацын тэргүүн Анжелик Кутзе “The Daily Telegraph” хэвлэлд өгсөн ярилцлагадаа дурджээ.
Түүний хэлснээр, “Омикрон” хувилбараар гол төлөв 20-30 насны залуус халдварлаж буй нь ажиглагджээ.
Тэдэнд сульдах шинж тэмдэг түлхүү илэрч байгаа бөгөөд амтлах, үнэрлэх чадварт ямар нэгэн өөрчлөлт гараагүй байна. Зургаан настай өвчтөнд өндөр халуурах, зүрхний цохилт ихсэх зовуурь ажиглагдсан байна.
Мөн ковидын шинжилгээ нь эерэг гарсан гэр бүлийн дөрвөн гишүүнд хэт сульдсан шинж тэмдэг илэрсэн бөгөөд урьд өмнө ажиглагдаж байгаагүй зовуурьтай өвчтөнүүд олноор хандах болжээ.
Анжелик Кутзе ийнхүү коронавирусийн шинэ омог гарч ирсэн байж болзошгүй талаар Өмнөд Африкийн эрх баригчдад мэдэгдсэн байна.
Даршамд, шинэ хувилбараар халдварласан өвчтөнүүдийн тал нь вакцин хийлгээгүй байсан байжээ.
Анжелик Кутзе эмч, өндөр настнууд, ялангуяа чихрийн шижин зэрэг хууч өвчтэй өвчтөнүүдэд илүү хүнд тусаж магадгүй гэж болгоомжилж буйгаа илэрхийлжээ. Өмнөд Африкийн хүн амын зургаан хувь нь 65-аас дээш насныхан эзэлдэг тул энэ насны бүлгийн өвчлөлийн нөхцөл байдал одоогоор тодорхойгүй байна.
Мөн тэрээр "Омикрон хувилбараар өндөр настнууд халдварлахаас урьдчилан сэргийлэх шаардлагатай. Ялангуяа вакцин хийлгээгүй өндөр настнууд хүндээр өвчлөх магадлал өндөр байна" гэж сэрэмжлүүлжээ.
