Австри улс вакцинд хамрагдаагүй хүмүүст хөл хорио тогтоосноос хойш хэдхэн хоногийн дараа буюу ирэх даваа гаригаас эхлэн үндэсний хэмжээнд ковид-19 хөл хорио зарлалаа.

Канцлер Александр Шалленберг энэхүү хөл хориог дээд тал нь 20 хоног үргэлжлэнэ гэсэн бөгөөд 2022 оны Хоёрдугаар сарын 1-нээс вакцинд хамрагдах хуулийн шаардлага бий болно гэж мэдэгдэв.

Тохиолдлын тоо нэмэгдэхийн хэрээр Европын бусад олон улс орнууд хязгаарлалт хийж байна.

"Бид тав дахь давалгааг хүсэхгүй байна" гэж Канцлер Шалленберг Австрийн есөн мужийн захирагч нартай тус улсын баруун хэсэгт байрлах нэгэн амралтын газарт уулзсаныхаа дараа хэлжээ.

Мөн тэрээр "Бид удаан хугацааны турш заавал вакцин хийлгэхгүй байх талаар зөвшилцөлд хүрч байсан" гэвч нөхцөл байдал өөр болж байна хэмээн канцлер яриандаа дурджээ.

Сүүлийн долоо хоногт тус улсад өвчлөлийн түвшин хоёр дахин өссөн бөгөөд Эрүүл мэндийн сайд Вольфганг Мукштейн хөл хорио тогтоох нь "эцсийн арга хэмжээ" гэж мэдэгдлээ.

Өнгөрсөн 24 цагийн дотор есөн сая хүрэхгүй хүн амд 15 мянга гаруй тохиолдол бүртгэгдсэн нь дээд амжилт юм.

Энэхүү арга хэмжээний дагуу Австричуудыг гэрээсээ ажиллахыг шаардаж, чухал бус дэлгүүрүүдийг хааж, нүүр тулан суралцах шаардлагатай хүүхдүүдээс бусдынх нь сургуулиудыг хаах юм. Арванхоёрдугаар сарын 12 хүртэл үргэлжлэх боловч 10 хоногийн дараа дахин үнэлгээ хийн хөл хорио сунгах эсэхийг шийдэх аж.

Хөрш зэргэлдээ Герман улсад энэ долоо хоногт хэд хэдэн өдрийн халдвар бүртгэгджээ.

Германы удирдагчид эмнэлэгт хэвтэх хүн ихтэй бүс нутагт вакцин хийлгээгүй хүмүүст хязгаарлалт тогтоохоор аль хэдийн тохиролцсон байна. Мөн иргэд автобус, галт тэрэг, ажлын байранд ковидын үнэмлэх үзүүлэх шаардлагыг парламент дэмжсэн байна.

Харин одоо Австритай хиллэдэг Бавари мужид төрийн ерөнхий сайд Маркус Содер цаашаа явж, "вакцин хийлгээгүй хүмүүсийг түгжсэн" гэж мэдэгджээ. Баар цэнгээний газрууд гурван долоо хоног хаагдах бөгөөд зул сарын баярын бүх арга хэмжээг цуцалжээ.

Долоо хоногт 100,000 хүнд ногдох өвчлөлийн түвшин 1,000-аас дээш байдаг газар ресторан, зочид буудал, спорт, соёл урлаг бас хаагдах болно гэсэн байна.

Словакийн Ерөнхий сайд Эдуард Хегер даваа гаригаас эхлэн "вакцин хийлгээгүй хүмүүсийн хөл хорио" эхэлнэ гэж аль хэдийн мэдэгдсэн бөгөөд Чехийн засгийн газар олон төрлийн үйлчилгээний хүртээмжийг хязгаарлаж байна. Нидерланд улс өнгөрсөн амралтын өдрүүдэд хэсэгчилсэн хөл хориог нэвтрүүлээд байгаа юм.

Их Британид одоогоор хөл хорио байхгүй байгаа ч 100,000 хүнд ногдох өвчлөлийн түвшин 395.4 тохиолдол байгаа нь тус улсын зарим хэсэгт амны хаалт зүүх шаардлагатайг харуулж байна.

Б.Бүжлхамаа

www.bbc.com