Цахим засаглалд шилжих, хүнд суртал, авлигагүй төрийн үйлчилгээг бүрдүүлэх Үндэсний хорооны ээлжит хурал өчигдөр болсон билээ. Энэ үеэр Авлигын эсрэг үндэсний хороог ахалж байгаа Ерөнхий сайд Л.Оюун-Эрдэнэ авлигын гэмт хэрэгт танил хүмүүс нь орооцолдсон, томилсон УИХ-ын гишүүнээрээ яриулж байгаа гэх утгатай зүйл ярьсан юм.
Тодруулбал, тэрээр "Өнгөрсөн зургаан сарын хугацаанд төрийн өндөр албан тушаалтнуудтай холбоотой 85 хэрэг шүүхээр эцэслэгдэж байгаа. Энэ дунд харамсалтай нь таньж мэддэг хүмүүс байгаа юм. Өмнө нь бол томилсон УИХ-ын гишүүнээрээ яриулаад яаж ийж байгаад аргалчихна гэсэн итгэл үнэмшил байсан юм шиг байгаа юм. Намайг Авлигын эсрэг үндэсний хороог ахалж байхад над руу хэн нэгнээр утасдуулаад нэмэр байхгүй. Цаашид энэ ажил улам эрчимжинэ. Ингэж байж авлигад цэг тавихгүй бол Монгол Улсад хэн ч хөрөнгө оруулахгүй, бизнесийн энгийн орчин бүрдэхгүй. Тиймээс хатуу байхаас өөр сонголтгүй. Шаардлагатай бол цаашид зарлаад явах эрх зүйн систем рүү орж болзошгүй шүү" гэсэн юм.
Тэгвэл Хууль зүйн сайд асан Х.Тэмүүжин өөрийн байр сууриа цахим хуудаснаа ийн хуваалцжээ.
Тэрээр "Авлигын эсрэг санаачлагыг ямагт дэмжих ёстой. Төрийн гол шийдвэр гаргагчдын эргэн тойронд ашиг сонирхлын зөрчил бөөгнөрөх, ах дүүс, амраг садангийн хэлхээ холбоонд төсвийн мөнгө үрэгдэх зэргээс Авлигын тэмцэл эхэлнэ.
Авлигачид нэг нэгнээ маш сайн таньдаг, мэддэг. Авлига нэрээр авлигачдыг бус өөр хэн нэгнийг шийтгэж байгаа тохиолдолд тэд "авлигатай хийх тэмцэл бидэнд огт хамаагүй юм байна, авсан авлигаасаа өгөх хувиа л зөв хүнд нь өгч чадвал яах ч үгүй юм байна" гээд харин ч бүр зоригждог!" гэлээ.
