Өмнөд Африк 2020 оны Гуравдугаар сараас хойш янз бүрийн түвшний олон хөл хорионд орсон бөгөөд Африк тивд ковидын халдвар, нас баралтын тоо хамгийн өндөр байна.

Өмнөд Африкчуудын хувьд тахал өвчнөөс улбаатай нийтээрээ нас барах эрсдэлтэй тулгарсан анхны тохиолдол энэ биш юм. 2000-аад оны эхээр Өмнөд Африк нь ДОХ-ын тахлын төвд байсан билээ. Коронавирус хоёр жил хүрэхгүй хугацаанд манай дэлхийг орвонгоор нь эргүүлсэн бол ХДХВ/ДОХ Өмнөд Африкийн үндэс суурийг арав гаруй жил ганхуулсан юм. Гэвч одоо ч ХДХВ шинэхэн булшнууд мөөг шиг олширч, ковидын цар тахлын үеэр ч дахин ниргэлээ.

Өмнөх тахал өвчний сургамж нь Өмнөд Африкт Ковид-19-ийн эсрэг тэмцэлд олон нийтэд мэдээлэл өгөхөд тусалсан. Ковидын хариу арга хэмжээг удирдсан эрдэмтдийн ихэнх нь ХДХВ/ДОХ-ын талаар ойлголт өгөх гэж оролдож байсан үетэйгээ ижил даваатай тулсан байна. Энэ удаа нийт иргэдийн дийлэнх нь шинжлэх ухааны үндэслэлтэй хариу арга хэмжээг илүү хялбар хүлээн авахад дэм болжээ. 

Худал мэдээлэл түгээмэл хэвээр байгаа ч тус улсын Эрүүл мэндийн сайд жимс, хүнсний ногоог ДОХ-ыг эмчлэхэд ашиглаж болно гэж зөвлөсөн 20 жилийн өмнөх шиг тийм ч өргөн тархаагүй гэнэ.

ХДХВ/ДОХ-ын эсрэг эм олж авахын төлөө лобби хийж байсан бүлгийн дарга Сибонгиле Цабалала "ДОХ-ийн үед улс төрийн хүсэл зориг байгаагүй. Энэ удаад засгийн газар Ковид-19 вакциныг олж авахын тулд шаргуу ажиллаж, хязгаарлагдмал боловч бодит амжилтанд хүрсэн” гэв.

Сайн талаараа вакцинууд ирэх хурд нь итгэл төрүүлж байгаа аж.

Өмнөд Африкийн 21 орчим хувь, Африкчуудын 6 хүрэхгүй хувь нь бүрэн вакцинд хамрагдсан нь зарим бүс нутгуудтай харьцуулахад удаашралтай боловч Ковид вакцинууд ХДХВ/ДОХ-ын тахлын үед Африкт ирсэн ретровирусын эсрэг эмүүдээс илүү хурдан нийлүүлэгдсэн байна.

Б.Бүжлхамаа