БНТУ-аас Монгол Улсад суугаа Онц бөгөөд Бүрэн Эрхт Элчин сайд Ахмет Язал Улаанбаатар Эмпати сургуулийн захирал Вейсел Акчайг баривчилсан талаар мэдээлэл хийлээ. Турк улсын зүгээс Монгол Улсад үйл ажиллагаа явуулж буй Эмпати сургуулиудыг ФЕТО террорист бүлэглэлийн эрх мэдлээс салгах зорилготой бөгөөд сурагчдад ямар нэгэн хохирол учрахгүй аж. Терроризмыг санхүүжүүлэгч боловсролын байгууллагыг Монголд хэвийн байлгаад байгаа нь Монгол Улсыг олон улсад террорист байгууллагыг санхүүжүүлдэг мэт сэтгэгдэл төрүүлж буй тухай Ахмет Язал өнөөдөр ингэж мэдэгдлээ. Тэр:

-Нууцаар ямар ч онгоц ирээгүй. Монгол Улсын Засгийн газар, ГХЯ-аас олгосон албан ёсны зөвшөөрлийн дагуу ирсэн. Манай улсын зүгээс Монгол Улсад ийм сонголт хийхийг тулгасан зүйл байхгүй. Хамгийн гол нь сурагчдын эрх ашиг. Бидний зүгээс энэ сургуулиудыг ФЕТО байгууллагын удирдлагаас холдуулах л хүсэлтэй байгаа. Дээрх сургуулиудад суралцагчдын төлбөр террорист байгууллагуудыг санхүүжүүлээд байгаа юм. Энэ нь Монгол Улсыг терроризмыг санхүүжүүлээд байгаа мэт харагдуулж байна гэж БНТУ-аас Монгол Улсад суугаа Онц бөгөөд Бүрэн эрхт Элчин сайд Ахмет Язал ярилаа.

Сануулахад, Улаанбаатар Эмпати сургуулийн Вейсел Акчай өөрийг нь өнгөрсөн долдугаар сарын 27-ны өдрийн 10:00 цаг орчимд гэрээсээ гарч явахад нь саарал өнгийн “Toyota Alphard” маркийн автомашинд суулган, нүдийг боон, есөн цаг орчим энхэл донхолтой шороон замаар авч явсан талаар мэдэгдсэн билээ. Мөн энэ өдөр Туркээс “СТ 4010” дугаартай онгоц Хөшгийн хөндийд буусныхаа дараа “Чингис хаан” олон улсын нисэх буудалд газардсан нь хууль бус ажиллагаа зохион байгуулж байгаа гэх хардлагыг төрүүлсэн. Улмаар багш, сурагчдын төлөөлөл нисэх онгоцны буудалд эсэргүүцлийн жагсаал зохион байгуулсны үр дүнд Монголын тусгай хүчнийхэн ажиллагаа явуулан Вейсел Акчайг Монголд үлдээсэн юм.