Швейцарь улс өнгөрсөн ням гаригт болсон бүх нийтийн санал асуулгаар ижил хүйстэн иргэний гэрлэлт болон хосуудын хүүхэд үрчилж авах эрхийг хуульчиллаа.
Швейцарийн холбооны канцлерийн гаргасан үр дүнгээс харахад Швейцарийн шууд ардчиллын тогтолцооны дагуу явуулсан бүх нийтийн санал асуулгад оролцогчдын 64.1 хувь нь ижил хүйстнүүдийн гэрлэлтийг дэмжсэн байна.
"Бүх хүмүүст зориулсан гэрлэлт" үндэсний хорооны гишүүн Антониа Хаусвирт хэлэхдээ "Бид маш их баярлаж, тайвширч байна" гэжээ.
Эмнести Интернэшнл мэдэгдэлдээ, "Ижил хүйстэн хосуудад иргэний гэрлэлтийг нээх нь тэгш эрхийн чухал алхам" гэж мэдэгджээ.
Хуульд нэмэлт өөрчлөлт оруулснаар ижил хүйстэн хосууд гэрлэж, тэдэнтэй цусан холбоогүй хүүхэд үрчилж авах боломжтой болно. Гэрлэлтээ батлуулсан лесбиан хосуудад үр суулгах замаар хүүхэд төрүүлэхийг зөвшөөрөх бөгөөд өнөөг хүртэл зөвхөн хоёр өөр хүйсийн гэрлэсэн хосуудад энэ заалт зөвшөөрөгдөж байсан юм.
Мөн шинэчлэгдсэн хуулиар Швейцар иргэнтэй гэр бүл болсон гадаад иргэн тус орны иргэншил авахад хялбар болно.
Швейцарийн Хууль зүйн сайд Карин Келлер Саттер хэвлэлийн бага хурлын үеэр хэлэхдээ, шинэ хуулиуд 2022 оны Долдугаар сарын 1-ээс хүчин төгөлдөр болно гэсэн юм.
Дашрамд, бүх нийтийн санал асуулгаар Швейцарийн сонгогчдын 64.9 хувь нь хөрөнгийн орлогын албан татвар ногдуулах саналыг татгалзсан байна.
Б.Бүжлхамаа
www.reuters.com
