Хойд Солонгос улс дахин баллистик пуужингийн туршилт хийсэн талаар Японы өөрийг хамгаалах хүчний эх сурвалжууд мэдээллээ. Пхеньяны туршсан пуужин Японы эдийн засгийн онцгой бүсэд унасан гэж мэдээлэлд дурджээ.

Тодруулбал, Японы засгийн газраас өгсөн мэдээллээр Хойд Солонгосын харвасан пуужин ойролцоогоор 750 км зайд 100 км-ийн өндөр хөөрч унасан байна. Сүүлд 2019 оны 10 дугаар сард БНАСАУ баллистик пуужингийн туршилт явуулж тус пуужин нь мөн л Японы эдийн засгийн онцгой бүс болох далайд унаж байсан юм.

Тэгвэл Хойд Солонгосын Нодон Синмун сонинд энэ талаар мэдээлэхдээ тус улсын зэвсэгт хүчин лхагва гаригийн өглөө төмөр замаас галт тэрэгнээс пуужингийн туршилт хийсэн талаар нийтэлжээ.

Гэхдээ ямар ангиллын пуужингийн туршилт байсныг болон энэ үеэр удирдагч Ким Жон Ун байлцсан эсэх талаар Пхеньяны талаас мэдээллээгүй байна. Үүнтэйгээр холбогдуулан Франц болон Эстон улсын хүсэлтээр НҮБ-ын аюулгүйн зөвлөлийн шуурхай хуралдааныг зарлаж хуралдуулсан юм. Ингэснээр энэ оны Гуравдугаар сараас хойших зарлагдаж байгаа Хойд Солонгосын пуужингийн туршилтын талаар хэлэлцэх анхны шуурхай хуралдаан болжээ.

НҮБ дахь Францын суурин төлөөлөгч сэтгүүлчдэд мэдээлэхдээ, Хойд Солонгосын пуужингийн туршилт хийсэн явдлыг НҮБ-ын аюулгүйн зөвлөлийн тогтоолыг зөрчсөн мөн олон улсын хамтын нийгэмлэг болон дэлхий нийтийн аюулгүй байдал заналхийлсэн үйлдэл хэмээн үзэж байгаагаа мэдэгдээд энэ асуудлаар хэлэлцэхээ цохон тэмдэглэжээ.

Хэвлэлийн бага хурлын үеэр НҮБ-ын хэвлэлийн төлөөлөгч Стефан Дюжаррик хэлэхдээ, Солонгосын хойгийг цөмийн зэвсгээс бүрэн ангижруулахад нөлөөлөх цорын ганц алхам бол дипломат харилцааны замаар асуудлыг шийдвэрлэх гэж мэдэгдсэн байна.

Ингэхдээ Хойд Солонгос цөмийн зэвсгээс бүрэн ангижрах чиглэлээр бүх талуудтай ярилцаа хэлэлцээ хийх ёстой гэжээ.

Үүнээс гадна Хятадын гадаад харилцааны сайд Ван И, Өмнөд Солонгосын Ерөнхийлөгч Мүн Жэ Интэй Пхеньяны сүүлд хийсэн пуужингийн туршилтын дараагаар уулзалт зохион байгуулсан юм. БНСУ-ын Ерөнхийлөгчийн засаг захиргаа Хойд Солонгостой яриа хэлэлцээгээ сэргээхийн тулд Хятадын хамтын ажиллагаа нэн чухал гэх байр суурийг баримталж байгааг Өмнөд Солонгосын талаас мэдээлжээ.

Гэхдээ БНАСАУ-ын пуужингийн туршилттай холбоотой асуудлаар Хятадын гадаад харилцааны сайд Ван И хараахан ямар нэгэн тайлбар хийгээгүй гэж Өмнөд Солонгосын Ёнхап агентлаг дамжуулсан байна.

Эх сурвалж: MNB.MN