Өчигдөр буюу пүрэв гаригт Ерөнхийлөгч Байден ерөнхийлөгчийн бүрэн эрхээ ашиглаж, Америкийн ажиллах хүчний гуравны хоёрыг коронавирусийн эсрэг вакцинд хамруулахыг, үүний дотор хувийн хэвшлийн 80 сая орчим хүнийг вакцинд хамрагдахыг албадан шаардана гэжээ. 

Жо Байден Хөдөлмөрийн аюулгүй байдал, эрүүл ахуйн захиргаанд дүрэм боловсруулж өгөхийг тушаасны дараа 100 ба түүнээс дээш ажилтантай хувийн хэвшлийн бизнес эрхлэгчид ажилчиддаа вакцин хийлгэх эсвэл долоо хоног бүр заавал шинжилгээ хийлгэх шаардлагатай боллоо.

Энэхүү дүрмээр холбооны ажилчид, гэрээт ажилчид болон санхүүжилт авдаг эмнэлэг болон бусад байгууллагуудын 17 сая эрүүл мэндийн ажилтнуудад вакцин хийлгэхийг мөн үүрэгджээ. Холбооны ихэнх ажилчид татгалзвал сахилгын шийтгэл эсвэл ажлаас халах зэрэг хариуцлага тооцох аж.

Жо Байден Цагаан ордонд хэлэхдээ, "Бид Ковид-19-ийн урсгалыг эргүүлж чадна, эргүүлэх ч болно" гэсэн юм.

АНУ-д дельта хувилбарын тархалт их байгаа бөгөөд Есдүгээр сард өдөрт ойролцоогоор 1500 орчим хүний ​​аминд хүрсэн байна. Ерөнхийлөгч Байден эхлээд вакциныг заавал хийх тухай яриа өрнүүлэхээс зайлсхийж байсан боловч халдварын өсөлт нь түүнийг илүү түрэмгий шинэ төлөвлөгөөний талаар шийдвэр гаргахад хүргэчээ.

АНУ-ын 12 ба түүнээс дээш насны хамрагдах боломжтой хүмүүсийн 27 орчим хувь нь ковидын эсрэг вакцин хийлгээгүй байгаа гэж Өвчний хяналт, урьдчилан сэргийлэх төвийн мэдээллээс харж болно.

Дэлхийн бусад хэсэгт ковидтой холбоотой: 

• Хойд Македонийн Ковид эмнэлэгт гарсан галын улмаас 14 хүн амиа алдсан бөгөөд бүгд өвчтөн байжээ.

• Царт тахлын улмаас Өмнөд Азийн 400 сая гаруй хүүхдийн сурлага тасалдлаа гэж Пүрэв гаригт НҮБ мэдэгдэв.

• НҮБ-ын дэмжлэгтэйгээр дэлхийг вакцинжуулах Covax хөтөлбөр энэ онд 1.4 тэрбум тун авах боломжтой гэж мэдэгдсэн бөгөөд энэ нь урьдчилан таамаглаж байснаас хагас тэрбумаар бага байна.

• АНУ-ын хүүхдийн эмнэлэгт наймдугаар сард Ковидтой 30,000 орчим хүүхэд ханджээ.

Б.Бүжлхамаа

www.nytimes.com