Хятад улс өнгөрсөн онд дарсандаа 218 хувь хүртэл татвар ногдуулсны дараа Австрали Дэлхийн Худалдааны Байгууллагад (ДХБ) албан ёсоор гомдол гаргалаа.

Худалдааны буруу үйл ажиллагаанаас болж тарифыг нэмсэн гэж Хятад улс мэдэгдсэн бөгөөд Австрали үүнийг няцааж байгаа юм.

Энэ асуудлыг шийдвэрлэхийн тулд Хятадтай шууд харилцахад бэлэн хэвээр байгаа гэж Австрали мэдэгджээ.

Хятад бол Австралийн дарсны экспортын хамгийн том зах зээл бөгөөд дарсны үйлдвэрүүд энэ огцом өсөлтөнд маш их нэрвэгдсэн гэж мэдэгджээ.

Энэхүү маргааныг ДХБ-д шилжүүлэх шийдвэрийг дарс үйлдвэрлэгчидтэй өргөн хэмжээнд зөвлөлдсөний дараа гаргасан гэж Австралийн засгийн газар мэдэгдэлдээ дурджээ.

Тодруулбал, "Засгийн газар бидний санал зөрөлдөөнийг шийдвэрлэхийн тулд ДХБ-д тогтсон системийг ашиглан Австралийн дарс үйлдвэрлэгчдийн эрх ашгийг тууштай хамгаалсаар байх болно" гэж Худалдаа, аялал жуулчлал, хөрөнгө оруулалтын сайд Дэн Техан хэлжээ.

Хятад улс Австралийг олон улсын худалдааны эрх зүйд хууль бусаар үйлддэг демпинг хэмээх худалдааны практикт буруутгаж байгаа юм.

Демпинг гэдэг нь тухайн улс дотооддоо зах зээл дээрээс авдаг үнээс доогуур үнээр бүтээгдэхүүнээ нөгөө рүү экспортлох явдал юм. Зорилго нь гадаад улс дахь зах зээлийнхээ хувийг нэмэгдүүлэх, өрсөлдөөнөөс хөөх явдал аж.

Хоёр улс нь худалдааны чухал түншүүд боловч Австрали улс Ковид-19 гарал үүслийн талаар олон улсын шалгалт хийхийг уриалснаас хойш дипломат харилцаа улам дордсон байна.

Австралийн Ерөнхий сайд Скотт Моррисоны засгийн газар эдийн засгийн шахалтад бууж өгөхгүй гэж удаа дараа мэдэгдэж байсан.

Өнгөрсөн оны сүүлчээр Хятад Австралийн дарсныхаа тарифыг нэвтрүүлж, таван жилийн турш тогтвортой байх боломжтой гэж мэдэгдсэн. Энэ нь арвай, үхрийн мах, нүүрс гэх мэт Австралийн бараанд олон сарын турш хориг арга хэмжээ авсны дараа хийсэн алхам байв.

Австралийн дарс үйлдвэрлэгчид 2020 оны Арванхоёрдугаар сараас 2021 оны Гуравдугаар сар хүртэлх дөрвөн сарын хугацаанд Хятадад ердөө 12 сая австрали доллар (9 сая доллар; 6,5 сая фунт) дарс тээвэрлэжээ.

Жилийн өмнөхөн мөн үед тэд Хятад руу 325 сая долларын үнэтэй дарс экспортолж байжээ.

Б.Бүжлхамаа

www.bbc.com