Коронавирусийн эсрэг вакцинжуулалтын явц удаашралтай байгаад санаа зовсон Пакистаны эрх баригчид эрс шийдэмгий арга хэмжээ авахаар шийджээ. Үүнд хоёр муж дахь хүмүүсийн гар утасны үйлчилгээг хаах, вакцинд хамрагдаагүй зарим төрийн албан хаагчдын цалинг зогсоох шийдвэр гаргасан байна.

Тэд коронавирусийн эсрэг вакцины талаарх гүнзгий эргэлзээ, тарилгын талаар илүү өргөн цар хүрээтэй хандахын тулд эдгээр арга хэмжээг авах шаардлагатай байна гэжээ.

Пакистан нь аюулгүй, үр дүнтэй болох нь батлагдсан вакцины талаар, ялангуяа полиомиелит өвчний талаарх ташаа мэдээлэлтэй удаан хугацаанд тэмцсээр ирсэн. Эцэг эхчүүд вакцин нь хортой, АНУ-ын хүүхдүүдийг үгүй хийх төлөвлөгөөний нэг хэсэг гэж үзэж, хүүхдүүддээ полиомиелитээс дархлаажуулахаас татгалздаг байна.

Энэхүү сөрөг суртал нь Пакистан хөрш Афганистанаас гадна дэлхийн саагийн вирусын хамгийн сүүлийн хоргодох газар болоод буй юм.

Мөн үүнтэй адилаар ковидын эсрэг вакцины гаж нөлөөний талаарх хуурамч онолууд Пакистанд өргөн тархсан байна.

Карачи хотын ачааны машины жолооч Эхсан Ахмед хэлэхдээ "Хүмүүс коронавирусийн халдвар авсны дараа хоёр жилийн дотор үхэх болно гэж би сонссон. Энэ бол 25 ам бүлтэй манай том гэр бүлд хэн ч өөрсдийгөө вакцинжуулах хүсэлгүй байгаа шалтгаан юм" гэсэн байна.

Засгийн газар энэ оны эцэс гэхэд 45-65 сая хүнийг вакцинжуулах зорилт тавьсан бөгөөд вакцины тунг худалдан авахад 1.1 тэрбум доллар зарцуулах төлөвлөгөөтэй байгаагаа саяхан мэдэгдсэн байна.

Гэсэн хэдий ч, энэ мягмар гаригийн байдлаар Пакистан Засгийн газрын мэдээллээр Хоёрдугаар сарын 3-ны өдрөөс эхлэн вакцинжуулалт эхэлснээс хойш 3 сая орчим хүнд вакцин хийлгэсэн байна.

Тус улсад COVID-19-ээс 22000 орчим нас баралт бүртгэгдсэн бөгөөд цар тахал эхэлснээс хойш 1 сая орчим хүн вирусын халдвар авсан нь тогтоогджээ.

Хүмүүсийг вакцин хийлгэхийг шаардахын тулд Пенжаб, Синдх гэсэн хоёр мужийн орон нутгийн эрх баригчид татгалзсан оршин суугчдын гар утасны үйлчилгээг хаахаар төлөвлөж байгаагаа мэдэгджээ

"Засгийн газар хүмүүст вакцин хийлгэх ажлыг хөнгөвчлөхийн тулд чадах бүхнээ хийж байна" гэж Синдхэд суугаа мэдээллийн сайд Сайед Насир Хуссейн Шах хэлэв. Тэрээр вакцинд хамрагдахгүй байх шийдвэрийг “хүлээн авах боломжгүй” гэж мэдэгджээ.

Захирамж хэзээ хүчин төгөлдөр болох, хэрхэн хэрэгжих талаар эрх баригчид одоогоор мэдэгдээгүй байна.

Үүний зэрэгцээ, Синдх мужийн Засгийн газар Долдугаар сараас эхлэн вакцинд хамрагдаагүй төрийн албан хаагчдын цалин хөлсийг зогсоохыг Сангийн яамандаа үүрэг болгожээ.

Уг арга хэмжээг зарласнаас хойш хуурамч вакцинжуулалтын гэрчилгээний талаарх мэдээлэл маш ихээр өссөн байна.

Энэ долоо хоногт Карачи боомт хотын цагдаа нар хотын хамгийн том вакцинжуулалтын төвд хуурамч вакцинжуулалтын гэрчилгээг тус бүрийг нь 12$ үнээр зарж байсан этгээдийг баривчилжээ.

Б.Бүжлхамаа

www.nytimes.com