Аймаг, сумын ИТХ-ын нөхөн болон дахин сонгуулийн санал хураалт өнгөрөгч зургадугаар сарын 25-нд орон даяар явагдсан. Энэ удаагийн нөхөн болон дахин сонгууль 11 аймгийн 29 сумын 43 хэсэгт болсон байна. Сонгуульд 83 нэр дэвшигч өрсөлдөж, 23477 сонгогч санал өгчээ. Гэвч зарим сумдад сонгогчдын ирц хүрээгүйн улмаас санал хураалтыг дахин явуулжээ.

Тухайлбал, Сэлэнгэ аймгийн Сайхан суманд дахин санал хураалт явуулж, АН-ын хоёр нэр дэвшигч ялалт байгуулжээ. Сайхан сумын ИТХ-ын төлөөлөгч сонгох нөхөн сонгуульд АН-аас нэгдүгээр багт нэр дэвшсэн Б.Мөнхтөр, хоёрдугаар багт нэр дэвшсэн С.Ганхишиг нар нийт сонгогчдын дийлэнх олонхийн саналыг авч ИТХ-ын төлөөлөгчөөр сонгогдов.

Сэлэнгэ аймгийн Сайхан сумын тухайд Хөтөл 1-р баг, Гавшгай 2-р багт нөхөн сонгууль явуулсан. Энэ хоёр багт МАН, АН, болон бие даагч зургаан хүн нэр дэвшсэн байна. Хөтөл 1-р багт 1960 хүн, Гавшгай 2-р багт 2890 хүн сонгогчийн нэрсийн жагсаалтад нэр нь бүртгэгджээ. Энэ сарын 25-нд эхний санал хураалтыг явуулахад оройн 20.00 цагийн байдлаар нийт санал өгөх иргэдийн ердөө 40 хувь нь саналаа өгөөд байв. Санал хураалтын цаг дуусахад ирц сонгогчдын жагсаалтад бүртгэгдсэн нийт сонгогчийн 50 хувьд хүрээгүй учир санал хураалтыг дахин явуулахад хүрсэн байна.

Б.Туяа