НИТХ-ын дарга С.Амарсайхантай холбоотой “Зүүн баян рефайнери” компанийн асуудал сүүлийн үед олон нийтийн анхаарлын төвд ороод байгаа. УИХ-ын гишүүн Б.Пүрэвдорж "С.Амарсайханы эзэмшлийн компанид олгосон газрыг цуцалбал С.Батболд өөрөө огцорно. Энэ хүмүүс хоорондоо холбоотой" гэсэн мэдэгдлийг Өргөдлийн байнгын хорооны хуралдааны үеэр хийсэн. Харин НИТХ-ын дарга С.Амарсайхан Б.Пүрэвдорж гишүүний хэлсэн үгийг үгүйсгэж доорх тайлбарыг хийсэн байна. Тэр:

-“Амарсайхан гэдэг хувь хүний эзэмшлийн компанид ямар нэгэн асуудал байхгүй. Бүтэн хаваржингаа, зунжингаа гүтгэж байна. Сүүлийн үед зохион байгуулалттай гүтгэх, доромжлох, шантаажлах ажил газар авч байна. Намын, төрийн нэрээр, төсвийн мөнгөөр олон жил ажил амьдралаа залгуулж ирсэн нөхөд авсан авлигынхаа мөнгийг хэвлэл мэдээлэл, сошиалаар цацаж Амарсайханыг зайлуулах санаатай байна. Авлига авсан мөнгөөрөө гутааж, доромжлоод Амарсайханыг зайлуулна гэвэл эндүүрэл. Би нийслэлийн 1.5 сая хүний аюулгүй байдал, өдөр тутмын амьдралыг хариуцаж байгаа хүн. УИХ-ын гишүүн элдэв юм ярихаар араас нь хөөгөөд явах шаардлага надад байхгүй. Тэр Б.Пүрэвдорж гишүүн их сонин юм ярьж байна лээ. Амарсайханы нэр дээрх газрыг цуцал ч гэх шиг. Юу ярьж байгаагаа ч мэдэхгүй. УИХ-ын гишүүд хувийн мөрдөгч, хөлсний гүтгэгч болчихсон юм уу гэж ойлгоход хүрч байна.

УИХ-д байгаа зарим нөхөд улс орноо элгээр нь хэвтүүлчихээд иддэг төсөв мөнгө нь байхгүй, худалддаг арилждаг албан тушаал нь байхгүй болчихоор шантааж хийдэг болсон байна. 10 хүн ажиллуулж, 10 төгрөгийн татвар төлж үзээгүй байж тэгж болохгүй. Би төрийн байгууллагад олон жил бугшсан асуудлыг зөв тал руу нь болгохын тулд ажиллаж байгаа. Газартай холбоотой асуудлыг би анх хөндөж тавьсан. Албан тушаалтнуудтай холбоотой хариуцлагын асуудлыг ярьж байгаа. Мафийн сүлжээнд орчихсон хүмүүсийн гар хөл болчихсон хүмүүс олон байна. Үүнээс үүдэж янз бүрийн гүтгэлэг явж байгаа” гэв.