Оюутолгой ордыг ашиглах, Хөрөнгө оруулалтын гэрээний хэрэгжилтийг шалгах, санал, дүгнэлт гаргах үүрэг бүхий Ажлын хэсгийн ахлагч УИХ-ын гишүүн Д.Тэрбишдагва өнөөдөр мэдээлэл хийлээ. 

Ажлын хэсгийн ахлагч, УИХ-ын гишүүн Д.Тэрбишдагва: 

- "УИХ-ын Ажлын хэсгийн гишүүд "Оюутолгой" компанийн удирдлагатай ажлын байранд нь уулзалт хийж, чиглэл, шаардлагатай холбогдох дутуу материалыг шуурхай гаргаж өгөх, ажиллах боломжоор хангах, үйлдвэрлэлийн үйл явцтай газар дээр нь танилцах зэргээр хамтран ажиллалаа.

ЗГХЭГ, "Эрдэнэс Монгол" ХХК-иас "Оюутолгой"-той холбоотой мэдээллийг танилцуулсан. 

Иргэдийн санал хүсэлт мэдээллийг хүлээн авч, иргэдийн хүлээлтэд бодит хариу өгөхийг зорьж байна. 

Дэд ажлын хэсгээс 1,500 хуудас бүхий танилцуулга, судалгааны материалыг хүлээж авсан. Эдгээр материалтай УИХ-ын Ажлын хэсэг танилцаж байна.

Бид нэгдсэн санал дүгнэлт гаргаж УИХ-ын удирдлага, Эдийн засгийн байнгын хороонд танилцуулна. 

Одоо гурван материал хүлээж байна. үүнтэй танилцсаны дараа бид дүгнэлтээ гаргаж, танилцуулна. Нэгдүгээрт, АТГ-ын шалгаж байгаа материалтай танилцахаар хүлээж байна. Мөн Аудитаас хийж байгаа шалгалтын материалтай мөн танилцах ёстой. Шалгалт нь хараахан дуусаагүй тул хүлээж байна. Гурвадугаарт, Засгийн газраас хийсэн шалгалтын дүнтэй танилцана. Материалыг нь авахаар 10 хоногийн өмнө бичиг явуулсан. Хариу нь хараахан ирээгүй байна. Үүний дараа Ажлын хэсгийн дүгнэлтээ гаргана.

Өнөөдөр бид Эдийн засгийн байнгын хороонд танилцуулна. Болж өгвөл УИХ-ыг энэ долоо хоногт завсарлуулахгүй, эсвэл хуралдааныг 1-2 долоо хоногоор сунгах, ээлжит хуралдаан зарлаж, энэ асуудлыг танилцуулах хэрэгтэй байгаа.

Татварын акт дээр болон ажлын хэсгийн материал дээр татвар зөрчилтэй гарч байна лээ. 150 сая ам.доллар байтугай юмнууд гарсан  учраас эцсийн дүнг хэлсэн нь дээр байх.

Хөдөлмөрийн харилцаа, нийгмийн асуудлыг хариуцсан Ажлын хэсэгт орж ажилласан УИХ-ын гишүүн Н.Оюунчимэг:

Би сая газар дээр нь очиж үзлээ. Өмнө нь ч хэд хэд очсон. "Оюутолгой" сүүлийн 10 гаруй жил нүүдлийн шувуу шиг байдалтай ажиллаж ирсэн. Ажилчид одоо болтол гэрт амьдарч байна.

"Оюутолгой"-д 14,000 хүн ажиллаж байгаа гэсэн хэрнээ хэд нь гэрээт, хэд нь үндсэн ажилтан нь ойлгомжгүй, цалин нь хүртэл нэлээд зөрүүтэй байсан. Гэрээгээр ажил гүйцэтгэгчдийг 14 мянган ажилтны тоонд оруулсан байдал харагдсан.

Оюутолгойн цахилгаан станцыг барих шийдвэрийг Засгийн газар яаралтай гаргах хэрэгтэй

Ажлын хэсгийн ахлагч, УИХ-ын гишүүн Д.Тэрбишдагва:

- Өмнийн говийн зөвлөлийг Засгийн газар байгуулсан. Гэхдээ зөвлөлөө ерөөсөө шахаж ажиллуулаагүй, шахаж шаардаагүй, нутаг орны ард иргэдийн сайн сайхны төлөө ажиллуулаагүй.

Би 2006-2016 он хүртэлх УИХ-ын чуулганд судалгаа хийсэн. Дандаа Цагаан сар, шинэ жил, Наадмын өмнө 200 орчим хуульд ашиг сонирхлын зөрчилтэйгөөр өөрчлөлт оруулсан байдаг.
Тухайлбал, 2009 оны долдугаар сарын 16-нд "Оюутолгой"-той холбоотой Татварын хууль, Ашигт малтмалын тухай хуульд өөрчлөлт оруулж байсан. 

ААНОАТ-ын тухай хуулиар томоохон ордуудын татварыг 20 хувь байсныг таван хувь болгоно гэснийг хэвээр үлдээхээр байр сууриа илэрхийлсэн. Татварын багц хуульд яаран өөрчлөлт оруулах шаардлагагүй гэж үзэж байгаа. 

"Оюутолгой"-н шинэ удирдлагатай илэн далангүй ярилцсан. Цахилгаан станцын асуудлыг бид хурцаар тавьсан. Шинэ удирдлага ч ЦС-ыг хамгийн түрүүнд хийх ёстой гэж хэлж байсан.

Дэлхийн хамгийн том нүүрсний орд Өмнийн говьд байна. Хамгийн чухал хэрэглэгч нь "Оюутолгой". Яагаад цахилгаан станцаа барихгүй байгаа юм бэ гэхэд "Бид барихад бэлэн байна. Барих сонирхол ч байна. Та нар л дэмжиж өг" гэсэн. хөрөнгө мөнгөө ч бараг босгосон байгаагаа хэлсэн. Үүн дээр Засгийн газар шийдвэрээ яаралтай гаргах хэрэгтэй.

УИХ-ын гишүүн Б.Бат-Эрдэнэ:

Үр ашгийг хүртэх хугацааг 2037 он болгож, Дубайн гэрээгээр хойшлуулсан. Тэнд манай залуус санаачилга гаргаж, ажиллаад 40 сая ам.долларын хэмнэлт гаргаж байхад энд хэдэн тэрбум төгрөгийн өрөнд орж байгаа нь анхны гэрээг хийсэн нөхдийн хариуцлагагүйгээс болж байна.

Ажлын хэсэг гараад шалгалт хийж байхад том аж ахуйн нэгжүүдийн татварыг хөнгөлөх хуулийг яагаад Засгийн газар оруулж ирдэг юм бэ гэж эсэргүүцэж байж хуулийн төслийг буцаасан.

Харин Засгийн газар 20 хувийн татвар авах тэр заалтаа хэвээр үлдээж байх шиг байна.