Тавдугаар сарын 1-ний өдрийн байдлаар АНУ-ын насанд хүрсэн 100 сая гаруй иргэн коронавирусийн эсрэг вакцинжуулалтад бүрэн хамрагдаад байгаа талаар мэдээллээ.
Тус улсын Өвчинд хяналт тавих, урьдчилан сэргийлэх төвийн мэдээлснээр иргэдийн 30.5 хувь нь вакцинжуулалтад бүрэн хамрагдсан байна. Мөн 144 сая гаруй хүн вакцины эхний тунг хийлгээд байгаа нь хүн амын 43.6 хувьтай тэнцэх үзүүлэлт аж.
Мөн тус улсын хэмжээнд 308 сая гаруй тун вакциныг түгээгснээс 240 сая орчмыг нь тарьсан байна.
АНУ-ын Ерөнхийлөгч Жо Байден үүрэгт ажилдаа орсон эхний 100 хоногтоо 200 сая тун вакцин тарих зорилт тавиад байсан бөгөөд Дөрөвдүгээр сарын сүүлээр зорилтдоо ийнхүү хүрчээ.
АНУ гурван вакцинд зөвшөөрөл олгосон бөгөөд өнөөдрийн байдлаар “Pfizer/BioNTech”-ийн 127 сая тун, “Moderna”-гийн 104 сая тун, “Johnson & Johnson”-ы 8.5 сая тун вакциныг тарьжээ.
