Монголын хуульчдын хоёрдугаар форум өчигдөр “Тогтвортой хөгжлийн зорилтууд-Хуульчдын оролцоо” уриан дор болж өнгөрсөн. Форумын үндсэн хуралдааныг “Үндсэн хуулийн эрх зүй ба цаашдын чиг хандлага” сэдвээр явуулж “Хараат бус шүүх ба хууль дээдлэх ёс”, “Хуульчийн ёс зүй ба хариуцлага”, “Хүний эрх ба цахим ертөнц”, “Эрүүгийн хууль тогтоомжийн хэрэгжилт, тулгамдаж буй асуудал”, “Үндэстэн дамнасан хууль зүйн туслалцаа”, “Чанартай хууль зүйн боловсрол: магадлан итгэмжлэл ба үргэлжилсэн сургалт”, “Хөрөнгийн ба санхүүгийн зах зээлийн эрх зүйн хөгжил”, “Хариуцлагатай уул уурхай: Нөхөн сэргээх асуудал” гэсэн найман салбар хуралдааныг зохион байгуулжээ.

Форумын үеэр хэлэлцсэн цаг үеийн нэг чухал сэдэв нь Засгийн газраас өргөн барьсан Захиргааны ерөнхий хуульд өөрчлөлт оруулах тухай хуулийн төсөл байв. “Засгийн газрын шийдвэр, түүнийг хэрэгжүүлсэн захиргааны бусад байгууллагууд, нутгийн захиргааны байгууллагуудын шийдвэр, үйл ажиллагаа Захиргааны ерөнхий хуулийн үйлчлэлд хараарахгүй” тухай хуулийн өөрчлөлтийг Монголын 5000 гаруй хуульчийг төлөөлж форумд оролцсон 435 хуульчийн 92,7 хувь нь эсэргүүцсэн байна. Тиймээс хуулийн төслийн талаарх санал, дүгнэлтээ зөвлөмж болгон өнөөдөр УИХ-ын Хууль зүйн байнгын хороонд хүргүүлжээ.

Б.ЗАЯА