Фэйсбүүк өөрийн платформоосоо Мьянмарын армийг хориглосноо мэдэгдлээ.
Ингэснээр тус компани иргэний удирдагч Дав Ан Сан Су Чи-г огцруулж, Хоёрдугаар сарын 1-нд засгийн эрхийг гэнэт булаан авсан хүмүүсийн эсрэг тус улсын ардчиллын хөдөлгөөнийг илэн далангүй дэмжиж байгаагаа илэрхийллээ.
Фэйсбүүк Мьянмарын цэргүүд тус сайтыг хэрхэн ашиглаж, тэр дундаа тус улсын мусульман Рохинжа цөөнхийн бүлгийг үзэн ядалтыг өдөөхөд хэрхэн ашигласан талаар олон жилийн турш шүүмжлэлд өртсөний эцэст энэ шийдвэр хэрэгжив.
Цэргийнхэн эрх мэдлийг гартаа авснаас хойш интернэтийг удаа дараа хааж, нийгмийн сүлжээний томоохон сайтууд, тэр дундаа Фэйсбүүк рүү нэвтрэх эрхийг хэд хэдэн удаа хязгаарласан. Гэсэн хэдий ч генералууд фэйсбүүкийг суртал ухуулга тараах зорилгоор ашигладаг байсан бөгөөд цэргийн өмчит бизнес эрхлэгчид ч мөн энэхүү платформ дээр сурталчилгаагаа явуулдаг байсан. Энэ журам хэрэгжиж эхэлснээр цэргийн өргөн цар хүрээтэй, цэвэр бус бизнесийнхэн болон армийн генералууд аль аль нь тус сүлжээг хэрэглэхээргүй боллоо.
Фэйсбүүкийн гүйцэтгэх захирал үг хэлэх эрх чөлөөг бүхнээс илүү дэмжиж ирсэн бөгөөд сайтыг зөвхөн засгийн газар эсвэл нийгмийн маргаанд оролцох гэж гарсан платформ, технологийн үйлчилгээ гэж үздэггүй гэдгээ илэрхийлжээ. Энэ байр суурь нь дэлхийн өнцөг булан бүрт хүчтэй шүүмжлэлийн анхаарлын төвд байсаар ирсэн бөгөөд ноён Цукерберг өөрийн поатформд тавигдсан постуудын эсрэг үйлдэл хийх хүсэл эрмэлзэлтэй болжээ.
Өнгөрсөн жил Фэйсбүүк QAnon хуйвалдааны онолын хөдөлгөөний талаарх хуудас, бичлэгүүдийг таслан зогсоосон бол өнгөрсөн сард АНУ-ын Конгрессын танхимд болсон үймээний дараа Фэйсбүүк Дональд Трампыг ерөнхийлөгч байх хугацаандаа энэ үйлчилгээг ашиглахыг хориглосон юм. Одоо ч түүний хандалтыг сэргээгээгүй байна.
Б.Бүжлхамаа
www.nytimes.com
