Улсын ерөнхий прокуророос УИХ-ын гишүүн Д.Гантулга, Д.Мурат нарын бүрэн эрхийг түдгэлзүүлэх санал гаргасан ч парламент хүлээж аваагүй нь ердөө долоо хоногийн өмнөх үйл явдал. Гэвч гишүүн Д.Гантулга өөрийн хүсэлтээр чөлөөлөгдөх өргөдөл гаргасныг УИХ өчигдрийн хуралдаанаараа хүлээж авсан юм. Ингээд парламент 75-уулаа боллоо.

Үүнээс өмнө Ерөнхийлөгч Х.Баттулга УИХ-ын 45, 47 дугаар тогтоолуудад хориг тавьж, УИХ-ын шийдвэрт хориг тавих тухай албан бичгийг УИХ-ын дарга М.Энхболдод хүргүүлсэн билээ. Тодруулбал, Д.Муратын УИХ-ын гишүүний бүрэн эрхийг нь түлгэлзүүлэх эсэх асуудлыг хэлэлцсэн тухай 45 дугаар тогтоол, Д.Гантулгын бүрэн эрхийг нь түдгэлзүүлэх эсэх асуудлыг хэлэлцсэн тухай УИХ-ын 47 дугаар тогтоолуудад хориг тавьсан юм.

Харин Д.Гантулгыг УИХ-ын гишүүнээс чөлөөлснөөр Ерөнхийлөгчийн хориг дан ганц Д.Мурат гишүүнд хамаарахаар болоод байгаа юм. Хоригтой холбогдуулж УИХ-ын гишүүн Д.Мурат “Ерөнхийлөгч хориг тавьсан байна. Би үүнийг нь дэмжиж байгаа. УИХ-ын гишүүн байна уу, жирийн иргэн байна уу бүгд хуулийн өмнө тэгш эрхтэй. Би шалгуулахад ч бэлэн байгаа. Удахгүй шалгуулаад буцаж орж ирнэ гэж бодож байгаа. Угаасаа надтай холбогдоод байгаа энэ хэрэг нь зохиомол. Би огт гэмт хэрэг хийгээгүй. Шалгуулахад бэлэн байна. Ерөнхийлөгчийн хоригийг миний хувьд дэмжиж байна' гэсэн юм. Өөрөөр хэлбэл, УИХ-аас Ерөнхийлөгчийн хоригийг хүлээж авсан тохиолдолд Д.Мурат гишүүн хуулийн байгууллагад ном журмынх нь дагуу шалгуулахаа илэрхийлсэн нь энэ байв.

Тэгвэл АН-ын дарга С.Эрдэнэ энэ асуудлаар байр сууриа илэрхийлжээ. Тэрээр “Энэ хүн гэмт хэрэгтэн биш. Шүүхийн эцсийн шийдвэр гараагүй байгаа. Угаасаа энэ асуудал эрүүгийн хуулиар нь авч үзвэл гэмт хэрэг биш. Түүнээс биш айл гэрт дайрч ороод хүчирхийлсэн юм биш. Хувь хүний харилцааны үл ойлголцол. Эр эмийн хоорондын асуудлыг би шийддэг хүн биш” гэжээ.