“Хүүхдийн төлөө фонд”-ын үйл ажиллагааг сэргээж буйтай холбогдуулан анхны хуримтлал үүсгэх зорилгоор “Монгол соёл-Монгол хүүхэд” цахим тоглолтыг өчигдөр орой Монголын олон телевизээр шууд цацаж, зохион байгууллаа.

Засгийн газрын өчигдөрийн хуралдаанаар "Хүүхдийн төлөө фонд" тусгай сан байгуулах шийдвэр гаргаж, 10 тэрбум төгрөгийн эх үүсвэрийг шийдвэрлэсэн. 

Харин хуримтлал үүсгэх хандивын тоглолтын үеэр нийт 2.211 тэрбум төгрөг цугларчээ. Маш олон иргэн, ААН байгууллагууд нэг өдрийн цалингаа хандивласан юм. Тухай бүрт мөн аль байгууллага, ямар хүнээс хандив ирсэн талаар дурьдаж байв. 

Мөн Олимпын аварга, МУГТ Н.Түвшинбаяр нэр хүндтэй олон тэмцээнд өмсөж байсан, Mizuno брэндийн өмсгөлөө зарах дуудлага худалдаагаар борлуулж, мөнгийг хүүхдийн санд хандивлав.

Сонирхуулахад, өнгөрсөн зуунд Юмжаагийн Цэдэнбал агсны гэргий Анастасия Цэдэнбал Филатова Монголын ард түмний ирээдүй хойч, үр хүүхдүүдийн төлөө хөдөлмөрлөж 1972 онд “Хүүхдийн төлөө фонд”-ыг байгуулан хот хөдөөгүй олон тооны цэцэрлэг, сургууль, эмнэлэг, хүүхдийн зуслан, хуримын ордон гээд маш олон бүтээн байгуулалт хийсэн түүхтэй байдаг.