Засгийн газрын өнөөдрийн хуралдаанаар "Хүүхдийн төлөө фонд" тусгай сан байгуулах шийдвэр гаргаж, тодорхой эх үүсвэрийг нь шийдэрлэлээ гэж мэдээлсэн билээ. Яг одоо Монголын олон телевизээр “Монгол соёл-Монгол хүүхэд” хандивын цахим тоглолт явагдаж байна. 

Энэ үйл явдлын талаар хуульч Х.Тэмүүжин өөрийн байр сууриа илэрхийллээ. 

Тэрээр фейсбүүк хуудаснаа "Хуучин цагт “Хүүхдийн төлөө фонд” гэж Монголын төрийн хийх ажлыг нэг том даргын гадаад эхнэр булааж аваад өөрөө хийсэн болоод явдаг хойдуудын суртал ухуулгийн сан байсан. Зардал нь Монголын төрд өр болоод үлддэг. Одоо хэний суртал, хэнд өр үлдээх сүнс босож ирж байгааг чөтгөр бүү мэд!

Шинээр байгуулагдсан Соёлын яам нь соц үеийн үзэл суртлын яам болсон бололтой. Монгол Улсыг буцаагаад социализмруу чирээд эхэллээ. Төсвөөс гадуур, засаг оролцсон сан байгуулаад, хандив нэртэй татвараар тусдаа бодлого тодорхойлох шинжтэй болоод явчихлаа.

Иргэдээс авсан татвараараа хийх ёстой байсан ажлаа хийгээгүй хулгайлчхаад нэмээд хандив өгчих одоо яг хийгээд өгье гээд байгаа бололтой. Соц үед даргын үг хууль байдаг байсан байж болно. Одоо бол хууль зөрчсөн дарга хариуцлага хүлээх ёстой нийгэм. Төр, төрийн бус холилдож, УИХ-ын зөвшөөрөл хяналтгүйгээр төсвөөс гадуур засаг мөнгө хурааж, зарцуулах бол уул нь албан тушаалын гэмт хэрэг.

Энэ засаг ковид далимдуулж хандив авч, нэг нэгнээ шагнаж, хуулийн хяналтгүйгээр жаал ажилласан. Зарим нэг нь гэмт хэрэгт шалгагдаад ч эхэлсэн. Одоо хүүхдийн нэр бариаад эхэллээ. Төр сайн дураараа ямар нэг САН байгуулаад ажлаа хийчихдэг бол төсөв гэж байгаад яах. Тэрийг нь иргэд төлөөлөгчөө сонгож, тэднээрээ дамжуулан баталдаг байгаад бас яах. Татвараас гадуур гоё нэртэй хандив санаачилж төр иргэдээ тонох бол энэ хүнд цагт шударга биш шүү. Хүүхдүүдийнхээ төлөө иргэдийн төлсөн татварыг ууж идчихээд одоо хандив өгчих бид алаад өгье гэдэг бол увайгүй дээрэм. Өвчин зовлон ирлээ эм тариагаа бэлдье гэхэд усан оргилуур бариад гүйгээд байдаг нөхөд, хүүхдийн гэсэн бүхнийг хулгайлчихдаг дарга нар одоо дор бүрнээ дураар САН байгуулж иргэдийн хоолны мөнгөнөөс ууж иддэг болохоор шийдэж.

Эд нар бүр сурчихлаа шүү. Санаачилж байгаа зүйл нь дандаа ардчиллаас ухарсан, хууль зөрчсөн, Монгол хэлний хамгийн сайхан, сэтгэл хөдөлгөм үгийг өөрсдийн хулгайг халхлах ПиАр болгож, хөнгөн гоёчилсон урлаг уран сайхнаар нухацтай судалгаатай, бодох ёстой бодлого шийдвэрийг орлуулах гэж оролддог боллоо..., ард нь ажил унасны хариуцлага хүлээх нэг ч хүн байхгүй.

Бүр хэтрээд Төрийн алба хаагчдын цалинг хэн нэг дарга нь алба хаагчдаас өөрсдөөс нь асуулгүйгээр кампаничилж хандивладаг жишиг тогтоод удлаа. Бусдын цалинг өмнөөс нь хандивлах асуудлыг тухайн эрх мэдэлтэн албан тушаалаа хэтрүүлсэн үйлдэл гэж үзэж хуулиар хязгаарлахгүй бол төр өөрөө хөдөлмөрийн мөлжлөг хийгээд байгаа мэт харагдах боллоо. Уул нь бусдын халаасанд хуруугаа дураараа хийхгүй байх гэдэг хүн ёсны энгийн соёл. Манай дарга нар дуртай үедээ ажлаас чинь халчихна шүү гэх заналхийллээрээ доод алба хаагчдынхаа цалин мөнгийг өмнөөс нь юунд зарахыг мэдэж, шийдэж болно гэж боддог болтой. Жанжилах үзэл гэж ийм л...

Төрийн өмчит аж ахуйн нэгжүүд ч мөн адил. Татварт төвлөрүүлэх орлогыг өөрсдийн хувийн мөнгө хөрөнгө шиг бусдад өгч, шагнах нь хэрээс хэтэрсэн. Ардаа авлигын сүүдэр хэтэрхий томоор дагуулсан байдалтай.

Монголд иргэнийхээ өмнө хүлээсэн үүргээ биелүүлсэн шиг биелүүлж, хийх ёстой ажлаа хийсэн шиг хийж, хариуцлагаа үүрсэн шиг үүрдэг ТӨР л хэрэгтэй байна даа" хэмээн бичжээ.