Сүхбаатар аймгийн Баяндэлгэр сумын уугуул уран бүтээлч Д.Амараагийн “Хаадын хөрөг” гэрэл зургийн үзэсгэлэн өнөөдөр Д.Занабазарын музейд нээнэ. 

Монголын өргөн уудам нутагт өнө эртнээс эзэн нь мэт оршсоор ирсэн хүн чулуун дурсгал, чулуун өв соёл элбэг. Тухайлбал, Сүхбаатар аймгийн Дарьганга сумын  Алтан овооны энгэрт  ноён, хатан, хүү, бэр хүн чулуу болон Хөргийн хөндийн  хүн чулуун дурсгалуудаараа алдартай юм.

Уран бүтээлч Д.Амараа “Хөрөг чулуу бол тал нутгийн тамга” хэмээн хэлж байсан юм. Тэрээр "Тал нутагтаа нүүдэллэн амьдардаг  монгол хүний  хувьд оюун санаа,  бие сэтгэл, амьдрал ахуйтай нь салшгүй нэг хэсэг болсон урлаг, оюун санааны цогц  бүтээл гэвэл хөрөг чулуу юм. Олон зууны нүүдэлчдийн ээдрээтэй цаг үеийн түүхийг  өөртөө тээн тэсэж үлдэн өнөө цагтай золгосон нууц нь чулуу хэмээх энгийн боловч  амьтай хэмээн үздэг байгалийн эд эсээр урласанд оршино” гэлээ.

Тэрээр сүүлийн 2 жилийн турш Монгол Улсын өргөн уудам талаар төдийгүй, ӨМӨЗО-ны Шилийн голын тал нутгаар судалгааны ажлаа явуулж хүн чулуудтай “хөөрөлдөн”,    нутгийн зон олонтой уулзан учирч эрт эдүгээгийн түүх намтрыг нь эрэн сурвалжилж  хээр талд мартагдаж хоцорсон хүн чулуудыг судалгааны эргэлтэд оруулж байгаа юм. 

Уран бүтээлч Д.Амараа Хүн чулуудын  судалгааны ажил хийх явцдаа  олон  арван  хүн чулуудыг шинээр нээн илрүүлж, баримтжуулан авчээ.

Тэрээр өмнө нь 1998 онд “Дөрвөн цагийн морьд” уран бүтээлийн үзэсгэлэн,  2018 онд “Дөрвөн зүгийн аяс” усан будгийн үзэсгэлэн, 2015 онд “Дарьганга нутгийн өнгө” гэрэл зургийн үзэсгэлэнгээ гаргаж байв.

Энэ удаагийнх нь түүний чулуун өв соёл, дурсгалын чиглэлээр хийсэн  судалгаанд суурилсан гэрэл зураг болон гар зургийн үзэсгэлэн аж.