Монголын эдийн засгийн чуулган дээр “Монгол Улс Шанхайн хамтын ажиллагааны байгууллага (ШХАБ)-д жинхэнэ гишүүнээр элсэх ёстой” гэж хэлсэн Ерөнхийлөгчийн байр суурь улс төрийн хүрээнд өргөн хэмжээний хэлэлцүүлэг өрнүүлээд байна. Энэ асуудлыг хамгийн түрүүнд эсэргүүцэж дуугарсан хүн нь Э.Бат-Үүл. Тэр “Ерөнхийлөгч Х.Баттулга чөлөөт ардчиллыг геополитикт эсрэгцүүлсэн нь том эндүүрэл. Том эндүүрэл байгаад зогсохгүй том эрсдэл дагуулсан политик” гэсэн байна. Энэ тухайгаа “Өнгөрсөн зуунд Монгол улс геополитикийн хайчинд орохдоо ардчиллаа устган, иргэдийнхээ өмч хөрөнгийг хураан, бизнес хийх эрхийг хориглон, дотоод гадаадын капиталыг шахан зайлуулж, сүм хийдээ шатаан, 40 мянга орчим гэмгүй иргэдээ хөнөөн эцэстээ нэг их гүрний "колони" болсноор дууссан. ШХАБ-ын жинхэнэ гишүүнээр элсэх тухай ярьж байгаа Ерөнхийлөгч маань шинэ зууны "шинэ колончлол"-ыг санал болгож байгаа юм биш үү” хэмээн бичжээ. Мөн Гадаад хэргийн сайд асан Ц.Мөнх-Оргил ч бас ШХАБ-д Монгол Улс элсэх нь буруу гэв.

Хамгийн сүүлд УИХ-ын гишүүн, Хууль зүйн сайд асан Х.Тэмүүжин өөрийн твиттер хуудсаараа дамжуулан ШХАБ-ын талаарх байр сууриа хатуухан илэрхийлжээ. Тэр “Энэ хоёр хүний өнгөн дээр Монгол зарагдах учиртай байж дээ. Таарсан таар шуудай нар. Юугаар улсаа сольж байгаагаа ил тод зарлах хэрэгтэй. Бид энэ наймаачдын наймаанд ямар үнэтэй байгаагаа мэдчих юмсан” хэмээн жиргэсэн байна. Түүний энэ үг Ерөнхийлөгч Х.Баттулга, Ерөнхий сайд У.Хүрэлсүх нарт ханджээ.

Учир нь Уул уурхай, хүнд үйлдвэрийн сайд Д.Сумяабазар ШХАБ-д жинхэнэ гишүүнээр элсэхийг дэмжиж байгаа бөгөөд Засгийн газар ч ийм байр суурьтай гэх тайлбар өгсөн байв. Харин ажиглагчид “ШХАБ-ын гишүүнээр элсвэл хоёр хөршөөсөө эдийн засаг болоод бусад зүйлээр хараат байдал руугаа аажмаар гулсана. Гуравдагч хөршүүд рүү чиглэсэн гадаад бодлого бүдгэрэн замхарч, дэлхийн улс гүрнүүдээс тусгаарлагдах эрсдэлтэй” гэж үзэж байна.

Б.ЗАЯА