АТГ-аас Ерөнхий сайд асан С.Баяр, Ч.Сайханбилэг болон Сангийн сайд асан С.Баярцогт нарыг Оюу толгойн хөрөнгө оруулалтын гэрээг байгуулахдаа эрх мэдэл, албан тушаалын байдлаа ашиглаж бусдад давуу эрх олгосон байж болзошгүй гэх үндэслэлээр яллагдагчаар татаж, ШШГЕГ-ын харяа Цагдан хорих 461 дүгээр ангид хориод багагүй хугацаа өнгөрлээ. Энэ хугацаанд Татварын ерөнхий газрын дарга асан Б.Ариунсан эрүүл мэндийн шалтгаанаар батлан даалтад гарсан бол саяхан Ерөнхий сайд асан С.Баярын бие муудаж, Сайд нарын II эмнэлэгт хэвтэн эмчлүүлж байна.

Энэ талаар МАХН-ын дарга өөрийн байр суурийг илэрхийлжээ. Тэр "Манай хорих ангийн нөхцөл байдал бол хоцрогдсон. Маш хүнд нөхцөлтэй. Хууль, шүүхийн байгууллага заавал хүнийг хорьж шалгах хэрэг байхгүй. Гар, хөлд нь бугуйвч зүүгээд гэрийн хорионд байлгаад шалгаж болно. Харин тэр хэргийг нуун дарагдуулах, чухал баримт устгах гээд байвал хорьж болно. Түүнчлэн гадагш зугтах гээд байвал тодорхой хугацаагаар цагдан хорьж болох юм. Тийм зүйл байхгүй тохиолдолд гадуур шалгаж болно. Би ч гэсэн хоригдож байхдаа ийм шаардлагыг олон дахин тавьж байсан" хэмээн ярьжээ.

Тэрээр цааш нь "Би бол хэлмэгдсэн хүн. Надтай ямар ч холбоогүй зүйлд хамааруулж шоронд хийсэн. Хууль, шүүхийнхэн ийм маягаар ажилладаг гэдгийг бүгд мэдэж байгаа шүү дээ. Гэхдээ энэ бол нэг, хоёр хүнтэй хариуцлага тооцох асуудал биш юм. Бид тогтолцоогоо өөрчлөх хэрэгтэй. Хамгийн эхэнд Оюутолгойн гэрээг нэн яаралтай хүчингүй болгох шаардлагатай" гэсэн байна.