Монголын хуульчдын холбооноос “Үндсэн хуулийн Цэцийн гишүүнд тавигдах шаардлага, түүний томилгоо” сэдэв хэлэлцүүлгийг өнгөрөгч баасан гаригт зохион байгуулав. Үндсэн хуулийн судалгаагаар мэргэшсэн бүхий л хуульч, судлаач нар уг хэлэлцүүлэгт оролцож, өнгөрөгч долоо хоногт УИХ-аар хэлэлцэгдсэн Цэцийн шинэ гишүүдийн томилгооны талаар хэлэлцлээ. Хуульчид шинээр томилогдсон Цэцийн гишүүдийн мэргэжил, боловсрол, ажлын дадлага туршлага зэргийг нь нэг бүрчлэн шүүн хэлэлцээд “Цэцийн гишүүнээр ажиллах чадамжгүй” гэж үнэлсэн байна. ЗГХЭГ-ын дэд даргаар ажиллаж байсан Ш.Солонгыг зөвхөн “мэргэшил, боловсролын хувьд шаардлага хангасан” гэж үзсэн боловч түүний өмнө хашиж байсан албан тушаал нь “хараат бусаар ажиллах боломж олгохгүй” гэж үзсэн байна.

Өөрөөр хэлбэл, Үндсэн хуулийн Цэц нь УИХ, Засгийн газраас баталсан хууль, бусад шийдвэрийг Үндсэн хуульд нийцсэн эсэхийг шүүн хэлэлцдэг байгууллага. Гэтэл Ш.Солонго нь ЗГХЭГ-ын даргаар ажиллаж байх үед нь гаргасан аливаа шийдвэрүүд дээр Цэцэд гомдол ирэхэд хараат бусаар шийдэх чадамжгүй гэж хуульчид хэлж байна. Мөн шинээр томилогдсон нөхдийн дотор 34 жил ажил эрхлэхдээ 21 жилд нь хувийн бизнес эрхэлсэн хүн ч байгаа аж. Түүний УИХ-ын тамгын газарт есөн жил референтээр ажилласан нь “Хууль зүйн өндөр мэргэшилтэй”-д тооцогдохгүй гэв.

Хэдийгээр УИХ Цэцийн шинэ гишүүдийг нүдээ аниад томилсон ч хуульчид үүнийг хүлээн зөвшөөрөхгүй, УИХ-ын гаргасан шийдвэрийг Үндсэн хуулийн Цэцэд өгнө гэв.

Б.ЗАЯА